ރާއްޖޭގެ އެންމެ ކާމިޔާބު ފުޓްބޯޅަ ކްލަބުތަކުގެ ތެރެއިން ނިއު ރޭޑިއަންޓްސް ސްޕޯޓްސް ކްލަބުން އެ ކްލަބުގެ ކޮންގްރެސް މި މަހުގެ 20 ވަނަ ދުވަހު ބޭއްވުމަށް ނިންމައިފި އެވެ.
ދެވަނަ ޑިވިޝަނުގައި މިހާރު ވާދަކުރަމުންދާ މި ކްލަބުގެ ޗެއާމަން އަހްމަދު ވާސިފް ވަނީ މަގާމުން އިސްތިއުފާ ދީފަ އެވެ.
އެ މަގާމަށް ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އަހްމަދު މުބީން އާއި ކްލަބުގެ ކުރީގެ ޗެއާމަން އަލީ ވަހީދު (ބަލަކް) ވަނީ ޝައުގުވެރިކަން ފާޅުކޮށްފަ އެވެ.
މުބީން ވަނީ ސޯޝަލް މީޑިއާގައި ޕޯސްޓެއް ކުރައްވައި، "މާތްﷲގެ ވާގިފުޅާއެކު މި ފަށާ ދަތުރުގައި ދިވެހިރާއްޖޭގެ އެންމެ ސަޕޯޓަރުން ގިނަ ކްލަބް އަލުން އަނބުރާ އިހު އޮތް މަގާމަށް ގެނެސް ނިއުގެ ސަޕޯޓަރުން ހެއްވާލަ ދޭނަން" ކަމަށް ވިދާޅުވެފަ އެވެ.
ނިއު އަކީ 2019 ވަނަ އަހަރު ދިމާވި ކުޅުންތެރިންގެ މުސާރައިގެ މައްސަލަތަކާ ގުޅިގެން އެފްއޭއެމްއިން ސަސްޕެންޑް ކުރި ކްލަބެކެވެ. ނަމަވެސް 2022 ވަނަ އަހަރު ވާސިފް އާއި އެހެނިހެން ސަޕޯޓަރުންގެ މަސައްކަތުން ކްލަބު އަލުން ކުޅެން ފެށި އެވެ.
އެންމެ ފަހުން ބޭއްވި ދެވަނަ ޑިވިޝަން މުބާރާތުގައި ވިކްޓަރީ ސްޕޯޓްސް ކްލަބާ ދެކޮޅަށް ކުޅުނު ސެމީ ފައިނަލްގައި 2-0 އިން ބަލިވެ ނިއު އަށް ވަނީ ފުރަތަމަ ޑިވިޝަނަށް ދިއުމަށް ލިބުނު ފުރުސަތު ގެއްލިފަ އެވެ.