ރާއްޖޭގެ ފުޓްބޯޅައިގެ ތާރީހުގައި ފާހަގަކޮށްލެވޭ އެއް ކްލަބް، ނިއުރޭޑިއެންޓް ސްޕޯޓްސް ކުލަބުން އެ ކުލަބުގެ ހުރިހާ ދަރަނިތަކެއް ހަލާސްކޮށްފައިވާ ކަމަށް އިއުލާނުކޮށްފި އެވެ.
މެންދުރު ޓީވީގައި ރޭ ދެއްކި ހާއްސަ ޕްރޮގްރާމެއްގައި ވާހަކަދައްކަމުން ކުލަބުގެ ބޯޑު މެންބަރު އުސްތާޒް އަލީ ރަޝީދު އަހްމަދު ވިދާޅުވި ގޮތުގައި ކުޅުންތެރިންނަށް ދައްކަންޖެހޭ އެންމެހައި ފައިސާ މިހާރު ވަނީ ދައްކާ ނިންމާފަ އެވެ. މީގެ ސަބަބުން ކުލަބުގެ މާލީ ހާލަތު ވަނީ ބޮޑުތަނުން ރަނގަޅުވެފަ އެވެ.
ކުލަބުގެ ޗެއާމަން ކަމަށް ކުރިމަތިލައްވާފައިވާ އަހްމަދު މުބީން ވިދާޅުވި ގޮތުގައި އެފްއޭއެމް އިން ކުރިން ކުލަބް ސަސްޕެންޑް ކުރުމަކީ ޒާތީ ނިންމުމެކެވެ. ނަމަވެސް ފީފާއިން އަޅާފައިވާ ޓްރާންސްފާ ބޭން އަކީ ރަނގަޅު ނިންމުމެއް ކަމުގައި އޭނާ ފާހަގަކުރެއްވި އެވެ.
"އަޅުގަނޑުމެންގެ އަމާޒަކީ ނިއުރޭޑިއަންޓް އަލުން ކުރީގެ މަޖާ މަތީ މަގާމަށް ގެންދިއުން. އެކަމަށްޓަކައި ވަކި މަގުޗާޓެއް ވާނީ އެކުލަވާލެވިފައި،" މުބީން ވިދާޅުވި އެވެ.
މާދަމާ ބޭއްވުމަށް ހަމަޖެހިފައިވާ ކުލަބުގެ ކޮންގްރެސްގައި އާ އަސާސީ ގަވާއިދެއް ފާސްކުރުމަށްފަހު އާ ބޯޑެއް އެކުލަވާލުމަށް ހަމަޖެހިފައިވެ އެވެ.
ކޮންގްރެސްގައި ކުލަބުގެ ޗެއާމަންކަމަށް ވާދަކުރައްވަނީ ކުރީގެ ޗެއާމަން އަލީ ވަހީދު (ބަލަކް)އާއި ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އަހްމަދު މުބީން އެވެ.
ރާއްޖޭގެ އެންމެ ކާމިޔާބު އެއް ކުލަބް ފުރަތަމަ ޑިވިޒަނުން ރެލިގޭޓްވުމަށްފަހު 2022 ވަނަ އަހަރު އަލުން ފުޓްބޯޅަ މައިދާނަށް ނުކުމެ، 2023 އަދި 2024 ވަނަ އަހަރު ދެވަނަ ޑިވިޒަންގައި ވަނީ ރަނގަޅު ކުޅުމެއް ދައްކާފަ އެވެ.