އިޒްރޭލް ޕާސްޕޯޓްގައި ރާއްޖެއަށް މީހުން އެތެރެވުން މަނާކުރަން ދިވެހިރާއްޖޭގެ އިމިގްރޭޝަންގެ ގާނޫނަށް ހުށަހެޅި އިސްލާހުގެ ބިލް އަންނަ އަހަރުގެ ފެބްރުއަރީގެ ނިޔަލަށް ފާސްކުރަން ބިލް ދިރާސާކުރާ ސަލާމަތީ ހިދުމަތްތަކާ ބެހޭ ކޮމިޓީ -- 241 ކޮމިޓީ އިން މިއަދު ކަނޑައަޅައިފި އެވެ.
ގާނޫނަށް މި އިސްލާހު ހުށަހެޅުއްވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ. ބިލްގެ ފުރަތަމަ ކިޔުން އޮތީ ޖޫން ހަތަރު ވަނަ ދުވަހު އެވެ. ބިލް ކޮމިޓީއަށް ފޮނުވީ ޖޫން 10 ވަނަ ދުވަހު އެވެ.
މި މައްސަލަ އެޖެންޑާކޮށް މިއަދު ބޭއްވި 241 ކޮމިޓީގެ ބައްދަލުވުމުގައި ތުޅާދޫ ދާއިރާގެ މެންބަރު އަބްދުލްހަންނާން ވަނީ ބިލާ ގުޅޭ ގޮތުން މަޝްވަރާކުރަން ޖެހޭ ގިނަ ބަޔަކު ތިބި ކަމަށް ގަބޫލު ކުރައްވާ ކަމަށް ވިދާޅުވެފަ އެވެ.
މަޖިލީހުގައި އަންނަ އަހަރުގެ ދައުލަތުގެ ބަޖެޓްގެ މަސައްކަތް އޮތުމުންނާއި ޑިސެމްބަރު މަހު މަޖިލިސް ޗުއްޓީއަށް ދާނެތީ އޭނާ ހުށަހެޅުއްވީ ބިލްގެ މަސައްކަތް އަންނަ ފެބްރުއަރީ މަހުގެ ނިޔަލަށް ނިންމުމަށެވެ.
މި ހުށަހެޅުމަށް ތާއީދު ކުރެއްވީ މާފަންނު އުތުރު ދާއިރާގެ މެންބަރު މުހައްމަދު ނާޒިމް އެވެ.
އިޒްރޭލް ޕާސްޕޯޓްގައި ރާއްޖެއަށް މީހުން އެތެރެވުން މަނާކުރަން ދިވެހިރާއްޖޭގެ އިމިގްރޭޝަންގެ ގާނޫނަށް ހުށަހެޅި އިސްލާހުގެ ބިލް ފެބްރުއަރީގެ ނިޔަލަށް ފާސްކުރަން ކަނޑައެޅީ ވޯޓުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.