އިޒްރޭލްގެ ޕާސްޕޯޓްގައި ރާއްޖެއަށް އެތެރެވުން މަނާކުރުމާގުޅޭ ގޮތުން ފަލަސްތީނާއި އަރަބި ގައުމުތަކުގެ ލަފާ ހޯދަންޖެހޭ ކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
އިޒްރޭލްގެ ޕާސްޕޯޓްގައި ރާއްޖެއަށް އެތެރެވުން މަނާކުރުމަށް ރާއްޖޭގެ އިމިގްރޭޝަންގެ ގާނޫނަށް ހުށަހެޅި އިސްލާހުގެ ބިލްގެ ދިރާސާކުރާ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ -- 241 ކޮމިޓީ ގެ ބައްދަލުވުމުގައި ފަލާހު މިއަދު ވިދާޅުވީ ޕާސްޕޯޓް މަނާކުރުމުން ފަލަސްތީނަށް އޮތް ފައިދާއެއް ބަލަންޖެހޭ ކަމަށެވެ.
ފަލާހް ވިދާޅުވީ އިޒްރޭލުގައިވެސް މުސްލިމުން އުޅޭ ކަމަށާއި އިޒްރޭލް ޕާސްޕޯޓް މަނާކުރާއިރު އަރަބި ގައުމުތަކުގެ ލަފާވެސް ހޯދަން ޖެހޭ ކަމަށެވެ.
އިޒްރޭލު ޕާސްޕޯޓްގައި ރާއްޖެއަށް އައުން މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ.
މީކާއީލް ހުށަހެޅުއްވި އިސްލާހުގައި ވަނީ އިޒްރޭލްގެ ޕާސްޕޯޓާއި އެހެން ގައުމެއްގެ ޕާސްޕޯޓެއް އޮތް ނަމަވެސް އިޒްރޭލް ޕާސްޕޯޓެއް ނަމަ ރާއްޖެ އެތެރެވުމުގެ ހުއްދަ ނެތް މީހެއްގެ ގޮތުގައި ކަނޑައެޅުމަށެވެ.
އެ ބިލް ދިރާސާކޮށް ގޮތެއް ނިންމަން މަޖިލީހުގެ 241 ކޮމިޓީއަށް ފޮނުވީ މިއަހަރުގެ ޖޫން 10 ވަނަ ދުވަހު އެވެ.