ފުލުހުންނާއި ސިފައިންނަށް ސަރުކާރުން ފޯރުކޮށްދޭ މެޑިކަލް ވެލްފެއާ ސްކީމް އުވާލައި އިންޝުއަރެންސް ޕްލޭނެއްގެ ތެރެއިން ފޯރުކޮށްދޭ ނިޒާމަކަށް ބަދަލުކުރަން ނިންމައިފި އެވެ.
ދައުލަތުގެ އަންނަ އަހަރުގެ ބަޖެޓު ތަފުސީލުގައި ފުލުހުންނާއި ސިފައިން އަދި އާއިލާތަކަށް މެޑިކަލް ވެލްފެއާ ސްކީމް މިހާރު ބައްޓަންވެފައި އޮތް ގޮތުން އެއް ފަރުވާއަކަށް އިތުރު ސްކީމެއް ކަނޑައެޅި ހަރަދު ކުރެވެމުންދާކަން ފާހަގަކޮށްފައިވެ އެވެ.
މި ގޮތުން މި އަހަރުގެ ނިޔަލަށް ފުލުހުންނާއި ސިފައިންގެ ބޭސްފަރުވާއަށް އާސަންދައިގެ ބޭރުން ޖުމްލަ 321.7 މިލިއަން ރުފިޔާ ހަރަދުވާނެ ކަމަށް ވަނީ އަންދާޒާކޮށްފަ އެވެ.
މި ސްކީމަށް މިހާރު ލިމިޓެއް ކަނޑައެޅިފައިނުވާއިރު ކޮސްމެޓިކް ޕްރޮސީޖާތަކާއި ބައެއް ކޮންސިއުމަބަލްސް ވެސް މި ސްކީމުގެ ތެރެއިން ލިބޭ ގޮތަށް ހަމަޖެހިފައިވެ އެވެ.
ފިނޭންސް މިނިސްޓްރީން ބުނީ ފުލުހުންނާއި ސިފައިންނަށް ޕްރައިވެޓް އިންޝުއަރެންސް ޕެކޭޖެއް ހަމަޖައްސައި އަހަރުގެ ތެރޭގައި ދައުލަތުން ހަރަދުކުރަންޖެހޭ މިންވަރު ކޮންޓްރޯލްކުރަން ނިންމާފައިވާ ކަމަށެވެ.
ޕްރައިވެޓް އިންޝުއަރެންސް ހަމަވުމުން އާސަންދަަ ނިޒާމުން ހިދުމަތް ލިބޭނެ ކަމަށް އެ މިނިސްޓްރީން ބުނެ އެވެ.