ބާސެލޯނާގެ މުހިންމު ދެ ކުޅުންތެރިން ކަމަށްވާ ސްޕެއިންގެ ލަމީން ޔަމާލް އާއި ޕޮލެންޑްގެ ރޮބަޓް ލެވަންޑޯސްކީ އަށް އަނިޔާވެ ދެ ކުޅުންތެރިން ވެސް ކުޅުމާ ދުރަށް ދާން ޖެހިއްޖެ އެވެ.
ބާސެލޯނާއިން މިކަން އިއުލާންކުރަމުން ބުނެފައިވަނީ ޔަމާލްގެ ފައިގެ ކުޑަހުޅަށް ލިބިފައިވާ އަނިޔާގެ ސަބަބުން އޭނާއަށް ގާތްގަނޑަކަށް ތިން ހަފްތާއަށް އަރާމުކުރަން ޖެހޭނެ ކަމަށެވެ. އަދި ލެވަންޑޯސްކީގެ ބުރަކަށްޓަށް ލިބުނު އަނިޔާއިން އަރައިގަތުމަށް 10 ދުވަހުގެ މުއްދަތެއް ނަގާނެ ކަމަށްވެސް ބުންޏެވެ.
ކުރިއަށް އޮތް އިންޓަނޭޝަނަލް ބްރޭކްގައި ޔުއެފާ ނޭޝަންސް ލީގުގެ މެޗުތަކުގައި މި ދެ ކުޅުންތެރިންނަށް އެމީހުންގެ ގައުމީ ޓީމުތަކަށް ނުކުޅެވޭނެ އެވެ.
އުމުރުން 17 އަހަރުގެ ޔަމާލްއަކީ މިވަގުތު ބާސެލޯނާގެ އެންމެ ފާހަގަކޮށްލެވޭ އެއް ކުޅުންތެރިޔާއެވެ. މި ސީޒަންގައި އޭނާ ވަނީ ހުރިހާ މުބާރާތެއްގައި 15 މެޗު ކުޅެ 6 ލަނޑު ޖަހާފަ އެވެ. ލެވަންޑޯސްކީ ވަނީ ލީގުގެ 13 މެޗުގައި ކުޅެ 14 ލަނޑު ޖަހައި، ލަނޑު ޖެހުމުގެ ވާދަވެރިކަމުގައި އެންމެ ކުރީގައި ހިފަހައްޓާފަ އެވެ.
ޔަމާލްއަށް އަނިޔާވީ ޗެމްޕިއަންސް ލީގުގައި ރެޑް ސްޓާ ބެލްގްރޭޑްއާ ދެކޮޅަށް ކުޅުނު މެޗުގަ އެވެ. މި އަނިޔާގެ ސަބަބުން އޭނާއަށް އާދިއްތަ ދުވަހު ރެއާލް ސޮސިއެދާދްއާ ދެކޮޅަށް ކުޅުނު މެޗުގައި ބައިވެރިނުވެވުނެވެ. އެ މެޗު ނިމުނީ ސޮސިއެދާދްގެ 1-0 އިން މޮޅުވެގެންނެވެ. މިއީ މި ސީޒަންގައި ލީގުން ބާސެލޯނާ ބަލިވި ދެވަނަ ފަހަރެވެ.