މޫސުމީ ބަދަލުތަކުން ލިބޭ ގެއްލުންތަކުގައި އެހީ ބޭނުން ވަނީ ބިލިއަނުން ނޫން ކަމަށާއި، އެހީ ބޭނުން ވަނީ ޓްރިލިއަނުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ ފްރޭމްވާކް ކޮންވެންޝަން އޮން ކްލައިމެޓް ޗޭންޖު (ޔޫއެންއެފްސީސީސީ)ގެ ކޮންފަރެންސް އޮފް ޕާޓީސްގެ 29 ވަނަ ސެޝަން (ކޮޕް29)ގެ ޕްލެނަރީގައި ރާއްޖޭގެ ފަރާތުން ގައުމީ ބަޔާން އިއްވަވަމުންނެވެ.
ރައީސް ވިދާޅުވީ މޫސުމަށް އަންނަ ބަދަލުތަކުގެ ހަގީގީ މިންގަނޑާ އެއްގޮތްވާ ގޮތުގެ މަތިން، ތިމާވެށީގެ ގެއްލުންތަކަށް ފައިސާ ލިބޭނެ އާ ލަނޑުދަނޑިއެއް މިހާރު ކޮންމެހެން ކަނޑައަޅަން ޖެހޭ ކަމަށެވެ.
މި ބަޔާނުގައި ރައީސް ވަނީ މޫސުމަށް އަންނަ ނޭދެވޭ ބަދަލުތަކުން އަރައިގަތުމަށާއި، މޫސުމަށް އަންނަ ބަދަލުތައް ކުޑަކުރުމަށާއި، ގެއްލުންތަކާއި ހިރާސްތަކަށް ހައްލު ހޯދައިދިނުމަށް ދޭ ބައިނަލްއަގްވާމީ މާލީ އެހީގެ ވައުދުތައް އިތުރުކުރުމަށް ގޮވާލައްވާފަ އެވެ.
ތަރައްގީވަމުން އަންނަ ކުދި ޖަޒީރާ ގައުމުތައް ނުވަތަ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)އަށް ކުރިމަތިވެފައިވާ ތަފާތު ގޮންޖެހުންތަކުގެ މައްޗަށްވެސް ރައީސް ވާހަކަދެއްކެވި އެވެ. އެގޮތުން ރައީސްގެ ވާހަކަފުޅުގައި ރާއްޖެއަކީ އާދަޔާ ހިލާފު ހިތްވަރެއް ލިބިފައިވާ ގައުމެއް ކަމުގައި ވިދާޅުވި އެވެ.
މީގެ އިތުރުން އެކަށީގެންވާ މާލީ އެހީ ނުލިބުމުގެ ސަބަބުން ރާއްޖެ ފަދަ ކުދި ޖަޒީރާ ގައުމުތަކުގެ އުއްމީދުތަކަށް ހުރަސްއެޅޭކަން ފާހަގަކުރައްވައި، ކްލައިމެޓް ފައިނޭންސްގެ އެންމެ ފަހުގެ އޮނިގަނޑުގައި، މިހާރު ބޭނުންވެފައިވާ ކަންކަމަށާއި، މުސްތަގުބަލުގެ ވިލުންވެރިކަމަށް އިސްކަން ދިނުމަށް ރައީސުލްޖުމްހޫރިއްޔާ ގޮވާލެއްވި އެވެ. ރާއްޖޭގެ ތިމާވެއްޓާއި ކަނޑުތަކަކީ، ރާއްޖޭގެ ސަގާފީ ވަންތަކަމުގެ ތެރޭގައި ހިމެނޭ ބައެއްގެ ގޮތުގައި ސިފަކުރައްވަމުން ރައީސް ވަނީ އެއީ އެގޮތަށް ގަބޫލުކުރަން ލާޒިމު އަދި އެގޮތުގައި ހިފަހައްޓަންޖެހޭ ކަމެއް ކަމަށްވެސް ވިދާޅުވެފަ އެވެ.
ރައީސް ވިދާޅުވީ މޫސުމާ ގުޅުން ހުރި ކަންކަމުގައި ވަކާލާތު ކުރުމުގައި ރާއްޖެއިން އަދާކުރާ ދައުރު ހިފަހައްޓާނެ ކަމަށެވެ. އަދި ހަކަތައިގެ އާ ސިޔާސަތާއި، ކާބޯތަކެތީގެ ކަށަވަރުކަމާއި، ބޯހިޔާވަހިކަމުގެ ފަހި މަސައްކަތްތަކާއި، އިގްތިސާދު ސިންދަފާތުކުރުމުގެ މަސައްކަތްތަކަކީ ދެމެހެއްޓެނިވި ގޮތެއްގައި ރާއްޖެއިން ކުރިއަށް ގެންދާ ކަންތައްތަކެއް ކަމުގައިވެސް ވިދާޅުވި އެވެ.
"2040 ވަނަ އަހަރު އަންނައިރު މޫސުމީ ބަދަލުތަކަށް ވިލުންވެރި ރާއްޖެއެއް ބިނާ ކުރުމަށްޓަކައި 20 އަހަރު ދުވަހުގެ ތަސައްވުރެއްގެ ދެލިކޮޕީ ދާދި އަވަހަށް އެކުލަވާލައި ހާމަކުރެވޭނެ،" ރައީސް ވިދާޅުވި އެވެ.
ރައީސްގެ ވާހަކަފުޅު ނިންމަވާލައްވަމުން މޫސުމަށް އަންނަ ބަދަލުތަކާ، ދުނިޔޭގެ އެހެނިހެން ކަންކަމަށް ކުރާ ހަރަދުތަކުގައި ހުރި ތަފާތުތައް ފާހަގަކުރައްވައި، މޫސުމީ ނޭދެވޭ ބަދަލުތަކަށް އަހުލުވެރިވުމަށް ކަނޑައަޅާފައިވާ މާލީ އެހީ ފޯރުކޮށްދިނުމަށް ކުރާ ހަރަދުތަކަށް އިސްކަންދެއްވުމަށް ދުނިޔޭގެ ގައުމުތަކުގެ ވެރިންގެ ކިބައިން އެދިވަޑައިގެންނެވި އެވެ.
ކޮޕް29 ގައި ހަރުދަނާ މާލީ ނަތީޖާއެއް ހޯއްދެވުމަށް އަޒުމް ކަނޑައަޅުއްވަމުން ރައީސް ވަނީ "މޫސުމީ ނޭދެވޭ ބަދަލުގެ ރާސްތާގެ ބަދަލުގައި، ދިރިއުޅުމަށް ބަދަލުތަކެއް ގެނައުމުގެ ރާސްތާ ހިޔާރުކުރުމަށް"ވެސް ގޮވާލައްވާފަ އެވެ.
ކޮޕް ސަމިޓް ކުރިއަށްދާ އަޒަރުބައިޖާންގެ ބާކޫއަށް ރައީސް މިއަދު ވަޑައިގެންނެވީ ސައުދި އަރަބިއްޔާގައި އޮތް ސަމިޓެއް ނިންމަވާލެއްވުމަށްފަހު އެ ގައުމުންނެވެ.