ސޯޝަލް ހައުސިންގެ ދަށުން ހުޅުމާލޭގައި 2،100 ހައުސިން ޔުނިޓް ގާއިމުކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
އެޗްޑީސީ އިން ބުނީ ބޯހިޔާވަހިކަމުގެ މައްސަލަ ހައްލުކުރުމުގެ ރިޔާސީ ވައުދުފުޅާ އެއްގޮތަށް ހުޅުމާލޭގައި އިޖުތިމާއީ ބޯހިޔާވަހިކަމުގެ އިތުރު ދެ މަޝްރޫއު ކުރިއަށް ގެންދަން ނިންމާފައިވާ ކަމަށެވެ.
މި މަޝްރޫއުގެ ދަށުން އިމާރާތްކުރަން ހަމަޖެހިފައިވަނީ ދެ ކޮޓަރި އަދި ތިން ކޮޓަރީގެ ސޯޝަލް ހައުސިން އެޕާޓްމަންޓްތަކެވެ.
އެޗްޑީސީ އިން ބުނި ގޮތުގައި މި މަޝްރޫއުގެ ތެރެއިން ދިވެހި ވިޔަފާރިތަކަށް ފުރުސަތު ލިބޭ ގޮތަށް ކޮމާޝަލް ޔުނިޓުތައްވެސް ގާއިމުކުރާނެ އެވެ.
ސޯޝަލް ހައުސިންގެ މި މަޝްރޫއަކީ "ޓްރާންސްފޯމިންގް ޓުމޯރޯ: ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ކީ ޕްރޮޖެކްޓްސް" ގެ ދަށުން ކުރިއަށްގެންދާ މަޝްރޫއެކެވެ.
ހުޅުމާލޭގައި ހައުސިން ޔުނިޓްތަކެއް ގާއިމުކުރަން ނިންމާފައިވާއިރު މިދިޔަ ސަރުކާރުން ހުޅުމާލޭގައި އިމާރާތްކުރަން ފެށި 4،000 ހައުސިން ޔުނިޓްގެ މަސައްކަތް މިހާރު ދަނީ ނިމެމުންނެވެ.
މީގެ އިތުރުން ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުން މާލޭގެ ރައްޔިތުންނަށް ގޯދި ދޫކުރުމަށް ކުރިއަށް ގެންދިޔަ ބިންވެރިޔާ ސްކީމްގެ ތެރެއިން ހުޅުމާލޭގެ ދެވަނަ ފިޔަވަހިން ދޫކުރަން ނިންމި ހުރިހާ ގޯއްޗެއް މިދިޔަ އޮކްޓޫބަރު މަހު ވަނީ ހަވާލުކޮށްފަ އެވެ.
ހުޅުމާލެ ތިންވަނަ ފިޔަވަހިންވެސް ގޯތި ދޫކުރާއިރު، ތިންވަނަ ފިޔަވަހި ހިއްކުމުގެ މަސައްކަތްވެސް ދަނީ ކުރަމުންނެވެ.
ހުޅުމާލޭގައި މިހާރުވެސް ލަގްޒަރީ އެޕާޓްމަންޓްތަކެއް ދަނީ އިމާރާތްކުރަމުންނެވެ.