މުޅިރާއްޖެއަށް ޕާސްޕޯޓާއި އައިޑީ ކާޑު ހެދުމުގެ ޕްރޮގްރާމު ރައީސް ޑރ މުހައްމަދު މުއިއްޒު މިއަދު އިފްތިތާހު ކޮށްދެއްވައިފި އެވެ.
މި ޕްރޮގްރާމުގެ ދަށުން މުޅިރާއްޖެއަށް މިހިދުމަތް ތައާރަފް ކުރިއިރު މިއަހަރު ޕާސްޕޯޓްގެ ހިދުމަތް ފަށާ ތަންތަނުގެ ތެރޭގައި މާލޭ ސަރަހައްދުގެ އިތުރުން ލ. ފޮނަދޫ އާއި ދ. ކުޑަހުވަދޫގައި ޕާސްޕޯޓް ހެދުމުގެ ހިދުމަތް ލިބިގެންދާނެ އެވެ.
މިއަހަރު އައިޑީ ކާޑު ހިދުމަތް ފަށާ ތަންތަނުގެ ތެރޭގައި މާލެ ސަރަހައްދުގެ އިތުރުން ކުޅުދުއްފުށި ސިޓީ ހިމެނެ އެވެ.
މިރަސްމިއްޔާތުގައި ވާހަކަދައްކަވަމުން ހޯމްލޭންޑް މިނިސްޓަރު އަލީ އިހްސާން ވިދާޅުވީ އިމިގުރޭޝަންއަށް މައުލޫމާތު ހުށައެޅުމުން ހުށަހެޅޭ މައުލޫމާތު ރައްކާތެރިކަމާއެކު ރައްކާކުރެވި ރަށްރަށުގެ ކައުންސިތަކުން އައިޑީ ކާޑާއި ޕާސްޕޯޓް ޕްރިންޓް ކުރެވިގެންދާނީ ރައްކާތެރިކަމާއެކު ކަމަށެވެ.
"އިމިގުރޭޝަންއަށް ހުށައެޅޭ މައުލޫމަތު ރައްކާތެރި ކުރެވިގެންދާނެ" އިހުސާނު ވިދާޅުވި އެވެ.
މި ހިދުމަތް މުޅިރާއްޖެއަށް އަންނަ އަހަރު ނިމުގެ ކުރިން ލިބިގެންދާނެ ކަމަށްވެސް މިނިސްޓަރު އިހްސާނު ވިދާޅުވި އެވެ.