ސްޕެއިން ކުއާޓަ ފައިނަލް އިން ޖާގައެއް ކަށަވަރުކޮށްފި

ޔުއެފާ ނޭޝަންސް ލީގުގައި ޑެންމާކާއި ސްޕެއިން ރޭ ބައްދަލުކުރި މެޗު 2-1 އިން ސްޕޭން މޮޅުވެއްޖެ އެވެ.

މި މޮޅާއެކު ޔޫރަޕްގެ ޗެމްޕިއަން ސްޕެއިން ވަނީ ކުއާޓާ ފައިނަލްގެ ޖާގައެއް ކަށަވަރުކޮށްފަ އެވެ.

ގްރޫޕުގައި މިހާތަނަށް ކުޅުނު 5 މެޗުން ސްޕެއިނަށް ވަނީ 13 ޕޮއިންޓް ލިބިފަ އެވެ. އޭގެ ފަހަތުން ދެވަނައިގައިވާ ޑެންމާކަށް ލިބިފައިވަނީ 7 ޕޮއިންޓެވެ. އަދި ތިންވަނައިގައިވާ ސާބިއާއަށް 5 ޕޮއިންޓް ލިބިފައިވާއިރު، އެންމެ ފަހަތުގައިވާ ސްވިޒަލޭންޑަށް ލިބިފައިވަނީ 2 ޕޮއިންޓެވެ.

މެޗުގެ ފުރަތަމަ ލަނޑު 15 ވަނަ މިނެޓުގައި ޖަހާފައިވަނީ ސްޕެއިންގެ މިކޭލް އޮޔަރްޒަބާލް އެވެ. މެޗުގެ 58 ވަނަ މިނެޓުގައި އަޔޯޒް ޕެރޭޒް ވަނީ ޑެނީ އޮލްމޯގެ އެހީގައި ސްޕެއިންގެ ދެވަނަ ލަނޑު ޖަހާފަ އެވެ. މެޗު ނިމުމުގެ ކުރިން 84 ވަނަ މިނެޓުގައި ޑެންމާކުގެ ގުސްޓާވް އިސަކްސެން ވަނީ އެ ޓީމުގެ ހަމައެކަނި ލަނޑު ޖަހާފަ އެވެ.

އަންނަ ހަފްތާގައި ސާބިއާ އާއި ޑެންމާކު ބައްދަލުކުރާއިރު ސާބިއާ މޮޅުވެއްޖެނަމަ އެ ޓީމަށްވެސް ކުއާޓާ ފައިނަލްގެ ޖާގައެއް ލިބިގެންދާނެ އެވެ. އަދި ގްރޫޕު ސްޓޭޖުގެ އެންމެ ފަހު މެޗުގައި ސްޕެއިން ކުޅޭނީ ސްވިޒަލޭންޑާ ދެކޮޅަށެވެ.