އިންޑޮނީޝިއާ ބްރިކްސްގައި ބައިވެެރިވާންވީތާ ކިތަންމެ ދުވަހެއް ވެއްޖެ ކަމަށް ވިދާޅުވެ އެ ގައުމުގެ ރައީސް ޕްރަބޯވީ ސުބިއާންތޯ، ބްރިކްސް ޖަމާއަތަށް ވަރަށް ބޮޑަށް ތައުރީފުކުރައްވައިފި އެވެ.
ބްރެޒިލްގައި އޮތް އިގުތިސާދީ ފޯރަމެއްގައި ވާހަކަދައްކަވަމުން ސުބިއާންތޯ ވިދާޅުވީ، އިންޑޮނީޝިއާގެ ރައީސްގެ މަގާމަށް އުންމީދުކުރެއްވި ދުވަހުން ފެށިގެން -- ވެރިކަން ލިބިވަޑައިގެންފި ނަމަ ބްރިކްސްގައި ބައިވެރިވާނެ ކަމަށް ވިދާލުވި ކަމަށެވެ.
ސުބިއާންތޯ އަދި ވިދާޅުވީ 2014 ގައި ކުރެއްވި ކެމްޕޭން ތެރޭގައި ވެސް، އިންޑޮނީޝިއާ ބްރިކްސްގައި ބައިވެރިވާން ޖެހޭ ކަމަށް ވިދާޅުވި ކަމަށެވެ.
އިންޑޮނީޝިއާގެ ވެރިކަން ލިބިވަޑައިގަތުމާ އެކު -- އޮކްޓޯބަރު 21 ގައި ރަޝިއާގެ ކަޒާންގައި އޮތް ބްރިކްސް ސަމިޓަށް އޭނާގެ ޚާރިޖީ ވަޒީރު ފޮނުއްވި ކަމަށް ސުބިއާންތޯ ވިދާޅުވި އެވެ.
ބްރިކްސްގެ މެމްބަރަކަށް ވުމަށް މަގުފަހިކުރުމަށް، ބްރިކްސްގެ ބައިވެރިއަކަށް އިންޑޮނީޝިއާ މިހާރު ވެފައިވާ ކަމަށް ސުބިއާންތޯ ވިދާޅުވި އެވެ.
ބްރިކްސްގެ ގަވާއިދު އޮންނަ ގޮތުން ބްރިކްސްގެ މެމްބަރުންނަށް އޮންނަނީ ވަކި މިންވަރެއްގެ ހައިސިއްޔަތެވެ. އޭގެ ތޭރޭގައި މަޝްވަރާ ބައްދަލުވުންތަކުގައި ވަޒީރުން ބައިވެރިކުރެއްވުމާއި ޚިޔާލު ހުށަހެޅުން ހިމެނެ އެވެ.
ނަމަވެސް، ފުރިހަމަ މެމްބަރުންނަށް އޮންނަ އިޚުތިޔާރުތައް -- ކަމެއް ނިންމުމަށް ވޯޓު ދިނުން އަދި އިންވެސްޓްކުރުން ފަދަ ބާރުތަކެއް ނޯވެ އެވެ.
ބްރިކްސްގެ ފުރިހަމަ މެމްބަރަކަށް ވެވެނީ، މެމްބަރަކަށް ވުމަށް ކަރުދާސްތައް ފުރިހަމަކުރުމަށް ފަހު އެ ޖަމާއަތުގެ ޚާއްސަ ބައްދަލުވުމަކުން ނިންމުމަށް ފަހު އެވެ.