މެންޗެސްޓާ ސިޓީގެ ކޯޗު ޕެޕް ގުއާޑިއޯލާ އެ ޓީމުގައި އިތުރު އެއް އަހަރު ދުވަހަށް މަސައްކަތް ކުރުމަށް އެއްބަސްވެއްޖެ ކަަމަށް އިނގިރޭސި ކުޅިވަރު ނޫސްތަކުގައި ރިޕޯޓުކޮށްފި އެވެ.
އާ އެއްބަސްވުމާއެކު ޕެޕްގެ އަތުގައި ސިޓީގެ ތާރީހުގައި އެންމެ ގިނަ ދުވަހު މަސައްކަތް ކުރި ކޯޗުގެ މަގާމު އޮންނާނެ އެވެ،
ގުއާޑިއޯލާއާ އެކު މި އެއްބަސްވުމުގައި މި މަހު ތެރޭގައި ސިޓީ އިން ސޮއިކުރާނެ ކަމަށް ބެލެވެ އެވެ. އޭނާގެ މިހާރުގެ އެއްބަސްވުން ހަމަވާނީ މި ސީޒަން ނިމުމުންނެވެ.
އިނގިރޭސި ޕްރިމިއަ ލީގުގެ ޗެމްޕިއަން މެންޗެސްޓާ ސިޓީގެ ތާރީހުގައި އެންމެ ކާމިޔާބު ކޯޗަކީ ގުއާޑިއޯލާ އެވެ.
އޭނާގެ އިރުޝާދާ އެކު މޮޅަށް ކުޅެގެން ސިޓީ އިން ވަނީ 15 ތަށި ހޯދާފަ އެވެ. މީގެތެރޭގައި ޕްރިމިއާ ލީގުގެ 6 ތަށި ހިމެނެ އެވެ.
އެއްބަސްވުން އާކުރުމަށް ނިންމީ މިހާރު ކުރިއަށްދާ ފީފާ ވިންޑޯގައި ލިބުނު ބްރޭކްގައި ގުއާޑިއޯލާއާއި ކްލަބާ ދެމެދު ކުރެވުނު މަޝްވަރާތަކަކަށް ފަހު އެވެ.
އޭނާގެ ކޮންޓްރެކްޓް ކުރިންވެސް އާކޮށްފައިވަނީ 2020 އަދި 2022 ވަނަ އަހަރުގެ ނޮވެމްބަރު މަހު އެވެ.
ނަމަވެސް ކުރިއަށް އޮތް ސީޒަންގައި ގުއާޑިއޯލާ މަސައްކަތް ކުރަން ޖެހޭނީ އޭނާގެ އެންމެ ގާތް އެހީތެރިއެއް ކަމަށްވާ ސްޕޯޓިން ޑައިރެކްޓަރު ޓިކްސި ބެގިރިސްޓައިން ނެތި އެވެ. އުމުރުން 60 އަހަރުގެ ބެގިރިސްޓައިން ވަނީ މި ސީޒަނަށްފަހު ރިޓަޔާ ކުރާނެކަން އިއުލާންކޮށްފަ އެވެ. ގުއާޑިއޯލާ ބުނެފައިވަނީ އޭނާގެ ކާމިޔާބީގެ އެއް ބަޔަކީ ބެގިރިސްޓައިންގެ މަސައްކަތް ކަމަށެވެ.
މި އެއްބަސްވުމާ އެކު ގުއާޑިއޯލާ މެންޗެސްޓާ ސިޓީގައި 10 ސީޒަން ފުރިހަމަ ކުރާނެ އެވެ. އޭނާ މީގެ ކުރިން ވަނީ ބާސެލޯނާ އަދި ބަޔާން މިއުނިކްގެ ކޯޗުކަންވެސް ކޮށްފަ އެވެ.