މާލޭ ސަރަހައްދަށް ރަޖިސްޓަރީ ކުރެވުނު ހަތަރު ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތް މިދިޔަ އަހަރާ އަޅާބަލާއިރު މިއަހަރު ވަރަށް ބޮޑަށް ދަށްވެއްޖެ އެވެ.
ޓްރާންސްޕޯޓް މިނިސްޓްރީން "ސަރުކާރު" ވެބްސައިޓްގައި ބުނެފައިވަނީ ގާނޫނާއި ގަވާއިދުގެ ތެރެއިން ނޫން ގޮތަކަށް އެއްގަމު އުޅަނދު ރަޖިސްޓަރީކުރުން ރައީސް މުހައްމަދު މުއިއްޒުގެ ސަރުކާރުން ނިމުމަކަށް ގެނެސްފައިވާ ކަމަށެވެ.
މީގެ އިތުރުން ހަތަރު ފުރޮޅުލީ ވެހިކަލް ރަޖިސްޓަރީ ކުރުމުގެ ކުރިން ގަރާޖެއް ދައްކަންޖެހޭތީ ދައްކަމުންދާ ގަރާޖުގެ ސައްހަކަން ކަށަވަރުކުރުމުގެ މަސައްކަތްވެސް މިނިސްޓްރީން ހަރުދަނާކޮށްފައިވާ ކަމަށް ޓްރާންސްޕޯޓް މިނިސްޓްރީން ބުނެ އެވެ.
އެ މިނިސްޓްރީން ބުނީ މި މަސައްކަތްތަކުގެ މައިގަނޑު މަގުސަދަކީ ހަތަރު ފުރޮޅުލީ އުޅަނދު ރަޖިސްޓަރީ ކުރުމުގައި ގާނޫނާއި ގަވާއިދުގެ ތެރެއިން މިނިސްޓްރީގެ ޒިންމާ އަދާކުރުމަށާއި އަދި އުސޫލުން ބޭރުން ރަޖިސްޓަރީ ވަމުންދިޔަ ދިޔުން ނިމުމަކަށް ގެނައުން ކަމަށެވެ.
ތަފާސްހިސާބުތަކާ ހަވާލާދީ ޓްރާންސްޕޯޓް މިނިސްޓްރީން ބުނީ ހަތަރު ފުރޮޅުލީ އުޅަނދު ރަޖިސްޓްރީ ކުރުމުގެ އުސޫލަށް މިސަރުކާރުން ގެނައި ބަދަލުގެ ނަތީޖާއެއްގެ ގޮތުން މިދިޔަ އަހަރާ އަޅާބަލާއިރު މިއަހަރުގެ އޮކްޓޫބަރު މަހުގެ ނިޔަލަށް މާލޭ ސަރަހައްދަށް ރަޖިސްޓަރީ ކުރެވުނު ހަތަރު ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތް 74.1 ޕަސަންޓް ދަށްވެފައިވާ ކަމަށެވެ.
މީގެއިތުރުން ދެ ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތްވެސް 8.1 ޕަސަންޓް މަދުވެފައިވާ ކަމަށްވެސް ޓްރާންސްޕޯޓް މިނިސްޓްރީން ބުނެ އެވެ.
"މި ފިޔަވަޅުތަކުގެ ސަބަބުން މާލެ ސަރަހައްދަށް އެއްގަމު އުޅަނދު އިތުރުވަމުން ދިޔަ މިންވަރު ވަނީ ވަރަށް ބޮޑުތަނުން ދަށްވެގެން ގޮސްފަ އެވެ. މި ފިޔަވަޅުތަކަކީ މާލޭގެ ޓްރެފިކް ހާލަތު ރަނގަޅުކުރުމަށް އެޅުނު މުހިންމު ފިޔަވަޅެކެވެ،" ޓްރާންސްޕޯޓް މިނިސްޓްރީން ބުނެފައިވެ އެވެ.
ތަފާސްހިސާބުތައް ދައްކާ ގޮތުން މިދިޔަ މާޗު މަހުގެ ނިޔަލަށް މާލެ ސަރަހައްދަށް އެކަނިވެސް 96,357 ސައިކަލާއި، 6،470 ކާރާއި އަދި 6،457 ހަތަރު ފުރޮޅުލީ އެހެން އުޅަނދުތައް ރަޖިސްޓަރީކޮށްފައިވެ އެވެ.