ދިރާގާއި ވިމެން އިން ޓެކް މޯލްޑިވްސްގެ ފަރާތުން އަންހެން ކުދިންނަށް ހާއްސަކޮށްގެން ކޯޑިންގް ދަސްކޮށް ދިނުމަށް ހިންގާ ސިލްސިލާ ޕްރޮގްރާމްގެ ތެރެއިން ގާލްސް ޓު ކޯޑްގެ ހއ. ދިއްދޫ އެޑިޝަން ނިންމާލައިފި އެވެ.
އެޗްޓީއެމްއެލް، ސީއެސްއެސް އަދި ޖާވާސްކްރިޕްޓް ބޭނުންކޮށްގެން ކޯޑިންގްގެ ހުނަރު ދަސްކޮށްދޭ މި ޕްރޮގްރާމަކީ އަންހެން ކުދިން ބާރުވެރިކުރުވުމުގެ މަގުސަދުގައި ކުރިއަށްގެންދާ ޕްރޮގްރާމެކެވެ.
ގާލްސް ޓު ކޯޑް ހއ. ދިއްދޫ އެޑިޝަން ފަރުމާކޮށްފައިވަނީ 10 އަހަރާއި 13 އަހަރުގެ ދެމެދުގެ އަންހެން ކުދިންނަށް، ޓެކްނޮލޮޖީގެ ދާއިރާއިން ފުރުސަތު ހޯދުމަށް ޝައުގުވެރިކަން އުފައްދާ މި ދާއިރާގައި އަންހެންކުދިންގެ ބައިވެރިވުން އިތުރުކުރުމަށެވެ.
މި ޕްރޮގްރާމްގައި އިސްކަންދީފައި ވަނީ ކުރިން ކޯޑިންގްގެ ތަޖުރިބާ ނެތް ކުދިންނަށެވެ. ދެމަސް ދުވަހަށް ކުރިއަށްގެންދެވުނު މި ޕްރޮގްރާމް މެދުވެރިކޮށް 20 ކުދިން ވަނީ ޕްރޮގްރާމް ކާމިޔާބުކަމާ އެކީ ނިންމާފައެވެ. އަދި މި ޕްރޮގްރާމް ނިމުނުއިރު ބައިވެރިންގެ އަމަލީ ހުނަރުތައް ތަރައްގީވެ، އަމިއްލައަށް ވެބްސައިޓް ފަރުމާކޮށް ޑިވެލޮޕްކުރަން ދަސްކޮށްދެވުނު ކަމަށް ދިރާގުން ބުންޏެވެ.
"މި ޕްރޮގްރާމްގެ އެންމެ މުހިންމު މަގުސަދަކީ ކުދިންގެ ޅަ އުމުރުގައި މިދާއިރާއަށް ލޯހުޅުވި، ޝައުގުވެރިކަން އުފައްދާ، މިއީ ކުރެވިދާނެކަމެއް ކަމަށް އަމިއްލައަށް ގަބޫލުކުރެވި އަދި އަމިއްލަ ނަފުސަށް ކުރާ އިތުބާރު އިތުރުވެގެން ދިޔުން،" ދިރާގުގެ މެނޭޖާ، ކޯޕަރޭޓް ސޯޝަލް ރެސްޕޮންސިބިލިޓީ، ބިޝާރާ ހަމީދު ވިދާޅުވި އެވެ.
ވިމެން އިން ޓެކް މޯލްޑިވްސްގެ ރައީސް ނަހުޒާ އިބްރާހިމް ވިދާޅުވީ ޒުވާން އަންހެން ކުދިން ޖޯޝާއެކު ކޯޑިންގްއަށް ޝައުގުވެރިކަން ފާޅުކުރުމަކީ ވަރަށް ބޮޑު އުފަލެކެވެ.
އެކުދިން ދައްކުވަމުން އެދަނީ ރަނގަޅު ފުރުސަތުތަކާ އެއްބާރުލުމާއެކު އެކުދިންނަށް ކޮންމެ ކަމެއް ވެސް ހާސިލްކުރެވިދާނެކަން ކަމަށާއި އުންމީދަކީ މި ޕްރޮގްރާމްގެ ސަބަބުން އެކުދިންނަށް ފަންނީ ހުނަރުތައް ލިބިގެން ދިއުމާއެކު، އުއްމީދީ މުސްތަގުބަލެއް ބިނާ ކުރުމަށް މަގު ފަހިވެގެންދާނެ ކަންކަމުގައި ނަހުޒާ ވިދާޅުވި އެވެ.
ވިމެން އިން ޓެކް މޯލްޑިވްސްއާ ގުޅިގެން ދިރާގުން ކުރިއަށް ގެންދާ ގާލްސް ޓު ކޯޑް ޕްރޮގްރާމަކީ ދިރާގުގެ ސީއެސްއާރު ޕްރޮގްރާމްގެ ތެރެއިން އަންހެނުން ބާރުވެރިކުރުވުމަށް އެކުންފުނިން ކުރާ މަސައްކަތުގެ މުހިންމު ބައެކެވެ.
މި ޕްރޮގްރާމް ވަނީ ހއ. ދިއްދޫގެ އިތުރުން ފުވައްމުލައް ސިޓީ، ގދ. ތިނަދޫ، ކުޅުދުއްފުށި ސިޓީ އަދި ލ. އަތޮޅުގައި ކުރިއަށް ގެންގޮސްފަ އެވެ.