ނ. ވެލިދޫ ގެއަކަށް ވަދެ، އެ ގެއިން ތިން ކާށްޓާއި ފަސް ކުރުނބާ ވަގަށް ނަގަން އުޅުނު މީހަކު ޖަލަށްލާން ހުކުމްކޮށްފި އެވެ.
މީގެ ތިން އަހަރު ކުރިން 2021 ވަނަ އަހަރުގެ މެއި މަހުގެ ތެރޭގައި ހިނގި މި ހާދިސާއާ ގުޅިގެން ނ. ވެލިދޫ މީހެއްގެ މައްޗަށް ދައުލަތުން އުފުލާފައިވަނީ އެހެން މީހެއްގެ މުދަލަށް ހުއްދަ ނޫން ގޮތެއްގައި ބާރު ހިންގަން އުޅުމުގެ ކުށުގެ ދައުވާ އެވެ.
މި ދައުވާ އުފުލާފައިވަނީ ކ. މާފުށީ މެޖިސްޓްރޭޓް ކޯޓު ގައެވެ. މާފުށީ ކޯޓުގައި މައްސަލަ ކުރިއަށް ގެންދިޔައީ ދައުވާ ލިބުނު މީހާ ހުރީ އެހެން މައްސަލައެއްގައި އޭރުވެސް މާފުށީ ޖަލުގައި ކަމަށްވާތީ އެވެ.
މި މައްސަލައިގެ ޝަރީއަތުގައި ދައުވާ ލިބުނު މީހާ ވަނީ އެ މީހާގެ މައްޗަށް އުފުލުނު ދައުވާއަށް އިއުތިރާފު ވެފަ އެވެ. އެހެންކަމުން މައްސަލަ ގެންދިޔައީ އަވަސް ނިޔާގެ މައްސަލައެއްގެ ގޮތުގައެވެ.
މައްސަލައިގައި ކުށަށް އިއުތިރާފުވެ، އެ މީހާ އެދުނީ ވީހާވެސް ލުއި އަދަބެއް ދިނުމަށެވެ. އޭނާ އެދުނު އެދުމަށް ބަލައި، މައްސަލައިގައި ލުއި އަދަބެއް ދޭން ބޭނުންވި ނަމަވެސް އެހެން މައްސަލައެއްގައި އޭނާގެ މައްޗަށް ކުށެއް ސާބިތުވެފައިވާތީ އަދަބު ލުއިކޮށްދެވޭނެ ގޮތެއް ނުވި އެވެ.
އެހެންވެ މި މައްސަލައިގައި ޝަރީއަތުން ނިންމީ އެ މީހާ އެއް މަހާއި ހަ ދުވަހަށް ޖަލަށް ލުމަށެވެ.