މާފުށީ ޖަލަށް މަސްތުވާތަކެއްޗާއި ފޯނު ވައްދާ ކަމަށް ތުހުމަތު ކުރެވިގެން ހައްޔަރު ކުރި ކަރެކްޝަނަލް ސާވިސްގެ 13 އޮފިސަރުންގެ ތެރެއިން ދައުވާކޮށްދޭން އެދި ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާ އެކަކު ބަންދުން ދޫކޮށްލައިފި އެވެ.
މިނިވަންކޮށްފައިވަނީ ކ. މާފުށީ މާވިނަ، ޒަޔާން އަހްމަދު އެވެ. އޭނާއަކީ ޖަލުގެ އާމަރީ ކުރިމަތިން ހައްޔަރުކުރި މީހެކެވެ. އޭނާ ހައްޔަރުކޮށްފައިވަނީ ޖޫން މަހުގެ 27 ވަނަ ދުވަހު އެވެ.
މާފުށީ ޖަލުގައި ފުލުހުންނާއި ސިފައިން ގުޅިގެން ހިންގި އޮޕަރޭޝަނެއްގައި މި އޮފިސަރުން ހައްޔަރުކުރީ މިދިޔަ ޖޫން މަހު އެވެ.
ޖަލަށް ޑްރަގާއި ފޯނު ވެއްދުމުގައި ޖަލު އޮފިސަރުން އެހީތެރިވާ ކަމަށް ކުރާ ތުހުމަތާ ގުޅިގެން ބެލިއިރު، މި އޮފިސަރުންގެ މައްޗަށް ތުހުމަތުވާ ހެކިތައް ހުރި ކަމަށް ފުލުހުން ބުންޏެވެ.
މި އޮޕަރޭޝަނަށްފަހު ފުލުހުން ބުނެފައިވާ ގޮތުގައި އެ ކުށް ކުރުމުގައި ޖަލު އޮފިސަރުންގެ 18 މީހަކު ބައިވެރިވި އެވެ. އެ މީހުންގެ އެކައުންޓްތަކަށް މިދިޔަ އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ޖަމާވެފައިވާ ކަމަށްވެސް ބުންޏެވެ.
އެއް އޮފިސަރެއްގެ އެކައުންޓަށް އެކި ފަހަރު މަތިން ޖުމްލަ 24 މިލިއަން ރުފިޔާ ޖަމާކޮށްފައިވާ ކަމަށްވެސް ފުލުހުން ވަނީ ބުނެފަ އެވެ. މައްސަލަ ތަހުގީގު ކުރުމަށްފަހު ދައުވާކޮށްދޭން ޕީޖީ އޮފީހަށް ފޮނުވައި، ފުލުހުން ވަނީ އެ އޮފިސަރުންގެ ވަނަވަރު ވެސް އާއްމުކޮށްފަ އެވެ. އެކަމަކު އޭގެ ތެރެއިން އެންމެންގެ މައްޗަށް ދައުވާއެއް ނުކުރެ އެވެ.
ދައުވާކުރަން ފޮނުވި 13 އޮފިސަރުން
- މާޒިން ހަމީދު، 22 (ހަވޭލި، ފ. ނިލަންދޫ)
- ޖިނާހް އަބްދުއްރަހީމް، 29 (އައިވަރީ ހައުސް، ރ. އުނގޫފާރު)
- މުހައްމަދު ފަތޫހް ފަތުހުﷲ، 24 (ކުއްޅަވަށްގެ، ގއ. ވިލިނގިލި)
- އަލީ ހިޝާމް، 33 (ބީޗްހައުސް، ކ. މާފުށި)
- މުހައްމަދު ނަބްހާން، 30 (ގ. އިވްނިންސްޓާ)
- މުހައްމަދު ނަބީލް އިބްރާހީމް، 21 (މ. މޭދާ)
- އަލީ ނާޒިމް، 36 (ތަރާނާ، ހދ. ނޭކުރެންދޫ)
- ޒަޔާން އަހުމަދު، 23 (މާވިނަ، ކ. މާފުށި)
- ޔާމީން ހުސެއިން 23 (ހިޖާޒް، ރ. މީދޫ)
- އަހްމަދު ޝަމާލް، 24 (ފަހާގެ، ށ. ފޯކައިދޫ)
- މުހައްމަދު ރިމާޒް، 29 (ދަނބުމާގެ، ށ. ފޯކައިދޫ)
- އަލީ އަޝްފާގު، 32 (ކާމިނީގެ، ނ. ލަންދޫ)
- އަހްމަދު އަނޫފް، 27 (ކާމިނީގެ، ނ. ލަންދޫ)
މާފުށީ ޖަލަށް ފޯނާއި މަނާ ތަކެތި ވައްދައިގެން ގިނަ އަދަދެއްގެ ފައިސާ ހޯދިކަމުގެ ތުހުމަތުގައި ދައުލަތުން ދައުވާކުރި ކަރެކްޝަނަލް ސާވިސް ފަސް އޮފިސަރުންގެ ތެރެއިން ތިން މީހަކާ އެކު ދައުލަތުން އިއުތިރާފްގެ އެއްބަސްވުމެއްވެސް ހަދާފައިވެ އެވެ. އެ މައްސަލާގައި ދައުލަތުން ދައުވާ ކުރަނީ ރ. އުނގޫފާރު އައިވަރީހައުސް، ޖިނާހް އަބްދުއްރަހީމާއި ނ. ލަންދޫ ކާމިނީގޭ އަލީ އަސްފާގާއި ކ. މާފުށީ ބީޗްހައުސް، އަލީ ޝަހީމާއި ގއ. ވިލިނގިލީ ކުއްޅަވައްގޭ މުހައްމަދު ފަތޫހު ފަތުހުﷲ އާއި ހދ. ނޭކުރެންދޫ ތަރާނާގޭ އަލީ ނާޒިމްގެ މައްޗަށެވެ.
މާފުށީ ޖަލަށް ތަކެތި ވައްދާ ކަމުގެ ތުހުމަތުގައި އޮފިސަރުންތަކެއް ހައްޔަރުކޮށް، ދައުވާކުރަން ފޮނުވިއިރު ބޮޑެތި ސްކޭމްތައްކޮށް ފައިސާ ފޭރިގަންނަ މައްސަލަތަކުގައިވެސް މާފުށީ ޖަލުގެ ގައިދީންނާ އެކު ކަރެކްޝަނަލް ސާވިސްގެ ޖަލު އޮފިސަރުންގެ ބައިވެރިވުން އޮތްކަން ތަހުގީގަށް ފާހަގަކުރެވިފައިވާ ކަމަށް ފުލުހުން ވަނީ ބުނެފަ އެވެ.