އޮސްޓްރޭލިއާގައި 16 އަހަރު ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރާ ބިލެއް ސަރުކާރުން ފާސްކުރަނީ އެވެ. ސަރުކާރުން ހުށަހަޅާ ޝަރުތަކާ ޚިލާފުވާ ޕްލެޓްފޯމްތައް ބޮޑެތި އަދަދުތަކުން ޖޫރިމަނާކުރެވޭ ގޮތަށް ވަނީ ހުށަހަޅާފަ އެވެ.
އޮސްޓްރޭލިއާގެ އޮންލައިން އެކްޓްގެ ނަމުގައި އޮންނަ ގާނޫނަށް ބަދަލުގެނެސް، ކުޑަކުދިންނަށް ސޯޝަލް މީޑިއާ މަނާކުރާ މާއްދާއެއް އިތުރުކުރަން ސަރުކާރުން -- ކޮމިއުނިކޭޝަން މިނިސްޓަރު، މިޝޭލް ރައުލަންޑް ވަނީ ނިންމަވާފަ އެވެ.
ސަރުކާރުން ހުށަހަޅާ ގޮތަށް މި މާއްދާ ފާސްވެއްޖެ ނަމަ، ހުރިހާ ތަކުލީފެއް ޖެހޭނީ ސޯޝަލް މީޑިއާތަކަށެވެ. ބެލެނިވެރިން އެއްވެސް ކަމެއް ކުރާކަށް ނުޖެހޭނެ އެވެ.
އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒްގެ ސަރުކާރުން ނިންމާފައި އޮތީ، ސޯޝަލް މީޑިއާ ބޭނުންކުރާ މީހުންގެ އުމުރު -- ކޮންމެ ޕްލެޓްފޯމަކަށް ވަންނައިރު ފާސްކުރުމަށެވެ. މި ގޮތުން އިޒުނަ ދިނުމުގެ ކުރިން އެކައުންޓް ބޭނުންކުރާ މީހާ އަކީ، ސަރުކާރުން ހުއްދަކުރާ އުމުރުގެ ކުއްޖެއްތޯ ބަލަން ޖެހެ އެވެ.
ސަރުކާރުގެ މި އަމުރާ ޚިލާފުވާ ބްލޮގިން ސައިޓްތައް، ގޮޅިއަކަށް ފެތި ބޮޑު ޖޫރިމަނާއެއް ކުރިމަތިވާނެ އެވެ.
އެންތަނީ އަލްބަނީޒް ވިދާޅުވި ގޮތުން އުމުރު ހައްދުކޮށް ސޯޝަލް މީޑިއާ ކޮންޓްރޯލްކުރަން ޖެހެނީ ބޮޑެތިވަމުން އަންނަ ސިކުނޑިތައް ގުދުރަތީ ގޮތުން ހެދިބޮޑުވުމަށް ފަުރުސަތު ދިނުމަށެވެ. އަދި އެކުދިންގެ އުމުރާ ނުގުޅޭ ކޮންޓެންޓްތަކުން އެކުދިންގެ ވިސްނުން ޚަރާބުވިޔަ ނުދިނުމަށެވެ.
އޮސްޓްރޭލިއާ ސަރުކާރަށް ވަރަށް ބޮޑަށް ފާޑުވިދާޅުވެ، އެކްސްގެ ވެރިޔާ އީލޮން މަސްކް ވިދާޅުވީ، އޮސްޓްރޭލިއާގެ ރައްޔިތުން ފަހަތަށް ހިނގަން ފެށީ ކަމަށެވެ.
އަދި ވައްކަންކުރުމަށް އާ ފުރުސަތުތަކެއް ސަރުކާރުން ޅަކުދިންނަށް ދަސްކޮށްދެނީ ކަމަށްވެސް މަސްކް ވިދާޅުވި އެވެ. މަސްކް ދެކެވަޑައިގަންނަވާ ގޮތުގައި ސޯޝަލް މީޑިއާ މަނާކުރުމަށް ވުރެ ކޮންޓެންޓް ކޮންޓްރޯލްކުރުން މާ ބޮޑަށްވެސް ރަނގަޅުވާނެ އެވެ.
ކުޑަކުދިންގެ އެ އުމުރަކީ، އުނގެނުމާއި ދަސްކުރުން ވަރަށް ބާރަށް ކުރިއަރައިގެން އަންނަ އުމުރަކަށް ވާތީ -- ދަސްކުރަން ލިބޭ ފުރުސަތުތަކަށް ހުރަސްއެޅުން ރަނގަޅު ނުވާނެ ކަމަށްވެސް މަސްކް ވިދާޅުވި އެވެ.