ރަޝިއާގެ ރިޔާސީ ގަނޑުވަރު، ކްރެމްލިންގެ ތަރުޖަމާން ދިމިތުރީ ޕެސްކޯފް ވިދާޅުވި ގޮތުން، ޚިޔާލުފާޅުކުރުމަކީ ހުޅަނގުގައި އޮންނަ ކަމެއް ނޫނެވެ. އެއީ ހުޅަނގާ ވަރަށް ބީރައްޓެހި ކަމެއް ކަމަށްވެސް ތަރުޖަމާން ވިދާޅުވި އެވެ.
ޕެސްކޯފް ވިދާޅުވި ގޮތުގައި، ހުޅަނގަށް މަޝްހޫރު ނޫސްތަކުން ހަދާ ދޮގުތަކަށް އެކަނި ބެލި ނަމަވެސް، އެއީ އިތުރު ގޮތެއް ނެތިގެން ދައްކާފައި ހުރި ވާހަކަތަކެއްކަން އެނގޭނެ އެވެ.
ހުޅަނގުގެ ބާރުގަދަ ސިޔާސީ ލީޑަރުން ވެސް ހިމެނޭ ގޮތުން، ޚަބަރު ފަތުރާ ވަސީލަތްތަކަށް ބިރުދެއްކުމުގެ ސަބަބުން ތެދު ބުނަން ނޫސްތަކަށް ދަތިވާ ކަމަށްވެސް ތަރުޖަމާން ވިދާޅުވި އެވެ.
ހުޅަނގުގެ ސަރުކާރުތައް އަޑީގައި ތިބެގެން، ގާނޫންހަދާ މަޖިލީހުގެ މެމްބަރުން ލަައްވައި ސޯޝަލް މީޑިއާ ހިންގާ ކުންފުނިތަކަށް އަދި މައިކްރޮބްލޮގިން ޕްލެޓްފޯމްތަކަށް ބިރުދެއްކުން އާންމުވެފައިވާ ކަމަށް ވެސް ޕެސްކޯފް ވިދާޅުވި އެވެ.
ޕެސްކޯފް ވިދާޅުވި ގޮތުން، ހުޅަނގުގެ މީޑިއާތަކަށް މިހާރު ޖެހިފައި އޮތް ހާލަކީ، ދުނިޔޭގެ ހާލަތު އޮޅުވާލުމެވެ. އާންމުންނަށް ހަގީގީ މަންޒަރު ގެނެސްދިނުމަކީ ނޫސްތަކަށް ކުރެވޭ ބޮޑު ކުށަކަށް ވެއްޖެ ކަމަށްވެސް އޭނާ ވިދާޅުވި އެވެ.
ސަރުކާރުތަކުން ބުނާ ގޮތް ނޫން ގޮތަކަށް ޚަބަރެއް ނުވަތަ ރިޕޯޓެއް ގެނެސްދީފި ނަމަ އޭނާގެ ބޮލުގައި ކޮންމެވެސް ތުހުމަތެއް އަޅުވައި ފަލީހަތްކުރާ ކަމަށްވެސް ޕެސްކޯފް ވިދާޅުވި އެވެ.
ޕެސްކޯފް ވިދާޅުވީ މަދުން ނަމަވެސް، ތެދުވެރި ނޫސްވެރިން ފެންނަ ކަމަށެވެ. އެކަމަކު އެ މީހުންނަށް ޖެހިފައި ވަނީ ފޮރުވި ތިބެގެން ލިޔުންތައް -- ކޮންމެވެސް އެހެން މީހެއްގެ ނަމުގައި ލިޔަން ކަމަށް އޭނާ ވިދާޅުވި އެވެ.
ރަޝިއާއިން މިހާރު ގެންގުޅޭ ސިޔާސަތަކީ، ތަރުޖަމާން ވިދާޅުވި ގޮތުން، ފޮރުވިގެން ތިބެ ލިޔާ ނޫސްވެރިންނަށް ކޮންޓްރެކްޓް ހަވާލުކުރުން ކަމަށެވެ. ބޭނުމަކީ އެއްވެސް ވަރެއްގެ އޮޅުވާލުމެއް ނެތް އާންމުންނަށް ގެނެސްދިނުން ކަމަށް އޭނާ ވިދާޅުވި އެވެ.