ބައެއް މިނިވަން މުއައްސަސާތަކުގެ ބައެއް މެންބަރުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފި އެވެ.
ކޮމިޓީން ނިންމީ އެންޓި ކޮރަޕްޝަން ކޮމިޝަން (އޭސީސީ)ގެ ނައިބް ރައީސް އަބްދުލް ސަލާމާއި އެ ކޮމިޝަންގެ މެންބަރު ތޯހާ މުހައްމަދާއި އިލެކްޝަންސް ކޮމިޝަން (އީސީ)ގެ ނައިބް ރައީސް އަލީ ނަޝާތާއި އެ ކޮމިޝަންގެ މެންބަރުން ކަމަށްވާ މުހައްމަދު އާސިފާއި ޑރ. މުހައްމަދު ޒާހިރު ވަކިކުރުމަށެވެ.
ކޮމިޓީއަށް ހުށަހެޅި މައްސަލައިގައި ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު ނާސިހް ވަކިކުރަންވެސް ހުށަހެޅި އެވެ. ނަމަވެސް ސިއްރު ކޮށްގެން މިއަދު ކުރިއަށް ދިޔަ ކޮމިޓީގެ ބައްދަލުވުމުގައި ނާސިހް މަގާމުން ވަކިކުރަން ނުނިންމާ ކަމަށް އެނގިފައިވެ އެވެ. ނަމަވެސް ނާސިހްއަށް ފިޔަވަޅު ނޭޅުމަށް ނިންމި ވަކި ސަބަބެއް ސާފުވާ ގޮތެއް ނުވި އެވެ.
މިމައްސަލައިގައި އަމީންއާންމު މިމަހުގެ 12 ވަނަ ދުވަހު މަޖިލީހަށް އިއްވި ސިޓީގައިވާ ގޮތުގައި ތޯހާއާއި ސަލާމް ވަނީ އޭސީސީގެ ގާނޫނުގެ 17 ވަނަ މާއްދާގެ (ހ) ގައިވާ އެ ކޮމިޝަންގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށް ބަޔާން ކޮށްފައިވާ މާއްދާއާއި އެ މާއްދާގެ (ށ) ގައި އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތެއް ހާސިލް ކޮށްގެން ނުވާނެ ކަމަށް ބުނާ މާއްދާއާ ހިލާފަށް އެތައް ކަމެއް ކުރައްވާފަ އެވެ.
އީސީ އާއި ސީއެސްސީގެ މެމްބަރުންނަށް ތުހުމަތުކޮށްފައި އޮތީ ސުލޫކީ ހަމަތަކާ ހިލާފުވި ކަމަށެވެ. އީސީއާއި ސީއެސްސީގެ ގާނޫނުގައި މެންބަރަކު ސުލޫކީ ހަމަތަކާ ހިލާފުވެއްޖެނަމަ މަގާމުން ވަކިކުރެވިދާނެ ކަމަށް ބުނާ ކަމަށްވެސް ސިޓީގައިވެ އެވެ. އެހެންވެ ގާނޫނަށް ރިއާޔަތްކޮށް ނަޝާތާއި، އާސިފާއި، ޑރ. ޒާހިރު އަދި ނާސިހްއާ ގުޅޭ މައްސަލައެއް ކޮމިޓީން ބަލަމުންދާ ކަމަށް އެ ދުވަހުގެ ސިޓީގައި ފާހަގަކޮށްފައިވެ އެވެ.
ބައެއް މިނިވަން މުއައްސަސާތަކުގެ ބައެއް މެންބަރުން ވަކިކުރުމުގެ މަސައްކަތް 20 ވަނަ ރައްޔިތުންގެ މަޖިލީހުން ފެށިއިރު ވަކިކުރާ ބޭފުޅުންނަކީ ނިމިދިޔަ 19 ވަނަ ރައްޔިތުންގެ މަޖިލީހުގައި އެމްޑީޕީގެ އަގުލަބިއްޔަތު އޮތް އިރު އެމްޑީޕީގެ ސަރުކާރުން މަޖިލީހަށް ނަން ފޮނުވައިގެން މަޖިލީހުން ރުހުން ދީގެން އައްޔަންކުރެއްވި ބޭފުޅުންނެވެ.