ރާއްޖެ ސަރަހައްދުން 468.6 ކިލޯގެ މަސްތުވާތަކެތި އަތުލައިގަތުމަށް ކުރިއަށް ގެންދިޔަ އޮޕަރޭޝަންގެ ކާމިޔާބީ ފާހަގަކުރައްވާ ރައީސް ޑރ. މުހައްމަދު މުއިއްޒު ތައުރީފް ކުރައްވައިފި އެވެ.
އިނގިރޭސިވިލާތުގައި މިވަގުތު ހުންނެވި ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ ސަރުކާރުން އެއްމެ އިސްކަންދޭ އެއް ކަންތައް ކަމަށެވެ.
"ގާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ޝުކުރު ދަންނަވަން،" ރައީސް ވިދާޅުވި އެވެ.
ކޮމިޝަނާ އޮފް ޕޮލިސް އަލީ ޝުޖާއު މިއަދު ނޫސްވެރިންނަށް މައުލޫމާތު ދެއްވަމުން ވިދާޅުވީ މަސްތުވާތަކެތީގެ މިމައްސަލަ ފުލުހުންނަށް އެމްއެންޑީއެފް އިން ރިޕޯޓް ކުރީ ރޭ ދަންވަރު 12:45 ހާއިރު ކަމަށެވެ.
ސީޕީ ވިދާޅުވި ގޮތުގައި މި ބޯޓު މިހާރު އޮތީ ހދ. ކުޅުދުއްފުށި ބަނދަރު ގައެވެ. ބޯޓުގައި ތިބި ފަސް ފިރިހެނުންނަކީ ވެސް ލަންކާގެ މީހުންނެވެ.
ބޯޓުގައި ހުރި މަސްތުވާތަކެތީގެ ޕްރެލިމިނަރީ ޓެސްޓުގެ ނަތީޖާ ދައްކާ ގޮތުން 344 ކިލޯއަކީ މެތު އަދި 124.6 ކިލޯ އަކީ ކޮކެއިން ކަމަށް ސީޕީ ވިދާޅުވި އެވެ.
ޝުޖާއު ވިދާޅުވި ގޮތުގައި އަތުލައިގެން މަސްތުވާތަކެތީގެ އަގު އެއް ބިލިއަން ރުފިޔާއަށް އަރާނެ އެވެ.
މިމައްސަލަ އަދިވެސް ތަހުގީގު ކުރަމުންދާތީ ބޯޓުގައި ހުރި މަސްތުވާތަކެއްޗާއި އެއްވެސް ދިވެއްސަކާ ގުޅުމެއްވާކަން ތަހުގީގުގެ މި މަރުހަލާގައި އަދި ދަންނަވަން ދަތި ކަމަށްވެސް ސީޕީ ވަނީ މައުލޫމާތު ދެއްވާފަ އެވެ.