ރައްޔިތުންގެ މަޖިލީހުގެ އިދާރާގެ އެންމެ އިސް ތިން މަގާމުގައި މިހާރުވެސް ތިއްބެވި ބޭފުޅުން އެ މަގާމުތަކުގައި ބޭތިއްބުމާމެދު މިއަދު ގޮތެއް ނިންމަން އެޖެންޑާކޮށްފި އެވެ.
މަޖިލީހުގެ ގަވާއިދު ބުނާ ގޮތުން އެ ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހާ ހިނދަކު ހިނގަމުންދާ މަޖިލީހުގެ އަމީންއާންމާއި މަޖިލީހުގެ ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމަށް މީހުން އައްޔަންކުރަންވާނެ ކަމަށް ބުނެފައިވެ އެވެ.
މަޖިލީހުގެ އަމީން ޢާންމުގެ މަގާމުގައި މިހާރު ހުންނެވީ ފާތިމަތު ނިޔުޝާ އެވެ. ކައުންސެލް ޖެނެރަލްގެ މަގާމުގައި ހުންނެވީ ފާތިމަތު ފިލްޒާ އެވެ. ސާޖެންޓް އެޓް އާމްސްގެ މަގާމުގައި ހުންނެވީ މޭޖަ (ރޓޑ) ތަލްހަތު ހަސަން އެވެ
މަޖިލީހުގެ މިއަދުގެ ޖަލްސާގައި ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މަޖިލީހުގެ އަމީން އާންމާއި ކައުންސެލް ޖެނެރަލް އަދި މަޖިލީހުގެ ސާޖެންޓް އެޓް އާމްސްގެ މަގާމަށް މިހާރުވެސް އެ މަގާމުތަކުގައި ތިއްބެވި ބޭފުޅުން އެ މަގާމުތަކުގައި ބޭތިއްބުމާމެދު ގޮތެއް ނިންމުމަށް މިއަދުގެ މަޖިލީހުގެ ޖަލްސާގައި ވޯޓު ނަގާނެ ކަމަށް ވިދާޅުވެފަ އެވެ.