ލޯބިވެރިޔާގެ ބަރަހަނާ ފޮޓޯތަކެއް ލީކްކުރާނެ ކަމަށް ބުނެ ބިރުދެއްކި ފުލުސް މީހާއަށް އެހެން މީހަކު ޖާމިނުވެ، އޭނާ ބަންދުން ދޫކޮށްލަން ކޯޓުގައި އެދިއްޖެ އެވެ.
ލޯބިވެރިޔާގެ ބަރަހަނާ ފޮޓޯތަކެއް ލީކުކޮށްލާނެ ކަމަށް ބުނެ ބްލެކްމެއިލް ކުރި މައްސަލާގައި ހައްޔަރު ކޮށްފައިވަނީ އއ. މަތިވެރި، ފަޒާ، އުމުރުން 19 އަހަރުގެ ޒައިދާން މުހައްމަދު އެވެ.
އޭނާއަކީ މަތިވެރި ޕޮލިސް ސްޓޭޝަންގައި މަސައްކަތްކުރާ ރެކްރޫޓު ފުލުހެއް ކަމަށް ދިވެހި ފުލުހުންގެ ހިދުމަތުން ބުނެ އެވެ.
ކޯޓު އަމުރެއްގެ ދަށުން މަތިވެރިން ޒައިދާން ހައްޔަރުކުރުމަށްފަހު މިހާރު އޭނަ ހުރީ މާލެ ގެނެސްފަ އެވެ.
ޒައިދާން އެންމެ ފުރަތަމަ ހައްޔަރުކޮށް ކޯޓުން އޭނާ ބަންދު ކުރަން ދިން މުއްދަތު ހަމަވުމުން، އަލުން ކޯޓަށް ގެންގޮސް އޭނާ ބަންދަށް އިތުރު 10 ދުވަސް މިހާރު ވަނީ ޖަހާފަ އެވެ.
ފުލުހުން ބުނީ ފުލުސް މީހާ އޭނާގެ ލޯބިވެރިޔާއަށް ބިރުދައްކާ ލޯބިވެރިޔާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކުކޮށްލާނެ ކަމަށް ބުނެ ބިރުދައްކާ އިންޒާރުދީ، ބްލެކް މެއިލްކުރި ކަމަށް ތުހުމަތު ކުރެވޭ ކަމަށެވެ.
ޒައިދާންގެ ބަންދު މުއްދަތު އިތުރުކުރި ރިޕޯޓުން އެނގޭ ގޮތުގައި އޭނާއަށް އެހެން މީހަކު ޖާމިނުވެ، ކަފާލާތުގެ ދަށުން އޭނާ ދޫކޮށްލަން ކޯޓުގައި އެދިފައިވެ އެވެ. އެހެންނަމަވެސް ޖާމިނުވުމަށް އެދި ހުށަހެޅި ހުށަހެޅުމުގައި ފުރިހަމަވާން ޖެހޭ ކަންކަން ފުރިހަމަވެފައި ނެތުމުން އޭނާ ދޫކޮށްލާފައެއް ނުވެ އެވެ.
ފުލުހުން ބުނީ މައްސަލަ އަދިވެސް އިތުރަށް ތަހުގީގު ކުރަމުންދާ ކަމަށެވެ.