އިންޓަނޭޝަނަލް ރެސިޑެންސް އެންޑް ސިޓިޒެންޝިޕް އެޑްވައިޒަރީ ފާމު ހެންލީ އެންޑް ޕާޓްނާޒް އިން ދޭ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދަށް ލިބިވަޑައިގެންފި އެވެ.
ރައީސް ނަޝީދަށް މި އެވޯޑަށް ދިނީ ސިންގަޕޫރުގައި މިހާރު ކުރިއަށްދާ ގްލޯބަލް ސިޓިޒެންޝިޕް ކޮންފަރެންސް ގައެވެ.
މިއީ ތިމާވެށި ހިމާޔަތްކުރުމާއި އިންސާނީ ހައްގުތައް ކަށަވަރުކޮށްދިނުމަށް ރައީސް ނަޝީދު ކުރައްވަމުން ގެންދަވާ މަސައްކަތްތަކުގެ އަގުވަޒަން ކުރުމުގެ ގޮތުން ދީފައިވާ އެވޯޑެކެވެ.
މިއެވޯޑާ އެކު ސެޓްފިކެޓަކާއި 20،000 ޑޮލަރުވެސް ރައީސް ނަޝީދަށް ލިބިވަޑައިގެންނެވި އެވެ.
ރައީސް ނަޝީދު މިވަގުތު ހުންނެވީ ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމުގައެވެ.