އިނގިރޭސިވިލާތުގެ ޓްރާންސްޕޯޓް މިނިސްޓަރު ލުއިސް ހޭ އިސްތިއުފާ ދެއްވައިފި އެވެ. އެއީ 2013 ވަނަ އަހަރު އޭނާ ބޭނުންކުރެއްވި، މަސައްކަތުގެ ދާއިރާގެ މޮބައިލް ފޯނެއް ވަގަށް ނެގީ ކަމަށް ވިދާޅުވެ އޮޅުވާލައިގެން ފުލުހުންނަށް މައުލޫމާތުދެއްވުމާ ގުޅިގެން -- އެކަން ހާމަވުމުންނެވެ.
އޭނާ އޭރު ބޭނުންކުރެއްވި ފޯނު އަމިއްލަ ގެއިން ފަހުން ވަނީ ފެނިފަ އެވެ.
ރިޕޯޓްތައް ބުނާ ގޮތުން ފޯނު ވަގަށް ނެގީ ކަމަށް ވަޒީރަށް ވިދާޅުވެވުނީ، ރޭގަނޑު ދަންވަރު ބޭރުގައި އުޅުއްވަނީކޮށް ގުރޫޕަކުން ހަަމަލާދިނުމުގެ ސަބަބުން ވަރަށް ބޮޑަށް ބިރުގެންފައި ހުންނެވުމުން ފޯނަށް ވީގޮތް އެނގިވަޑައި ނުގަތީ އެވެ.
މި ހާދިސާ ހިނގިއިރު ލުއިސް ހޭގެ އުމުރުން 24 އަހަރެވެ. ސަރުކާރުގެ މަގާމެއްގައި އޭނާ އޭރު ހުންނެވި ނަމަވެސް -- ޓްރާންސްޕޯޓް ވަޒީރުކަން ހަވާލުކުރެއްވީ އިނގިރޭސިވިލާތުގެ މިހާރުގެ ބޮޑުވަޒީރު ކެއާ ސްޓޯމާ އިނގިރޭސި ބޮޑުވަޒީރުގެ މަގާމާ ހަވަލުވެވަޑައިގެން 5 ޖުލައި 2024 ގައެވެ.
އިސްތިއުފާދެއްވަން މެދުވެރިވި ސަބަަބު ބާޔާންކުރައްވައި ލުއިސް ހޭ ވަނީ ބޮޑުވަޒީރަށް ސިޓީއެއް ފޮނުއްވާފަ އެވެ. މި ސިޓީގައި ވަޒީރު ވިދާޅުވި ގޮތުން، މަގާމުގައި ދެމިހުންނަވަން ނިންމަވައިފި ނަމަ، ރައްޔިތުންގެ އިތުބާރު ސަރުކާރަށް ގެއްލިދާނެ އެވެ.
އަދި މިފަދަ އިތުރު ހާދިސާއެއް ދިމާވެއްޖެ ނަމަ، ސަރުކާރު މާލިއްޔަތުގައި ޖެހިވަޑައިގަންނަވާ މީހެއްގެ ގޮތުގައި ލޭބަލްކުރެވިދާނެ އެވެ.
އިސްތިއުފާދެއްވަނީ ސަރުކާރަށް ހެޔޮ އެދިވަޑައިގަންނަވާތީ ކަމަށް ޓްރާންސްޕޯޓް ވަޒީރު ވިދާޅުވި އެވެ.
ލުއިސް ހޭގެ ސިޓީއަށް ޝުކުރު އަދާކުރައްވައި ބޮޑުވަޒީރު ހެޔޮ ބަަސް ވިދާޅުވި އެވެ. އަދި ސަރުކާރުގެ ޓްރާންސްޕޯޓް ސިޔާސަތު ތަންފީޒުކުރެއްވުމަށް ލުއިސް ކޮށްދެއްވި މަސައްކަތަށް ތައުރީފުކުރައްވައި ޝުކުރު އަދާކުރެއްވި އެވެ.