އެމެރިކާގެ މަޝްހޫރު ވިޔަފާރިވެރިޔާ އީލޮން މަސްކް ފާޑުވިދާޅުނުވާ އެއްވެސް ކަމެއް ދުނިޔޭގައި މިހާރަކު ނުހިނގަ އެވެ. ގައުމުތަކުގެ ދާޚިލީ ކަންތައްތަކުގެ ތެރެއަށް ވަދެވަޑައިގެން ސަރުކާރުގެ ބައެއް ވެރިންނާއި ކުންފުނިތަކުގެ ވެރިން މަގާމުން ދުރުކުރަން ވެސް މަސްކް ވަނީ ގޮވާލައްފާފަ އެވެ.
އިނގިރޭސިވިލާތުގައި ވެރިކަންކުރާ ޕާޓިގެ އިސްވެރިންނަކީ ހައިސިއްޔަތެެއް ނެތް އަދި ކުޑަކުދިންނާ އެކު އަޚުލާގީ ގޮތުން ދަށް ދަރަޖައިގެ އަމަލުތައް ތަކުރާރުކޮށް ހިނގާ ބައެއް ކަމަށްވެސް މަސްކް ވިދާޅުވި އެވެ.
އިނގިރޭސި ބޮޑުވަޒީރަށް ހުރި ވާޖިބުތައް -- އެ މަގާމުގައި މިހާރު ހުންނެވި ކީރު ސްޓާމާއަށް ނުއުފުލެއްވާ ކަމަށް ވިދާޅުވެ އޭނާ މަގާމުން ދުރުކުރަން އާންމު ރައްޔިތުން ނުކުންނަން ނުޖެހޭތޯ ވިދާޅުވެ މަސްކް ވަނީ ސުވާލުކުރައްވާފަ އެވެ.
ބޮޑުވަޒީރު ކީރު ސްޓާމާއާ ހެދި އަޚުލާގީ ގޮތުން ދަށް ބަޔަކަށް އިނގިރޭސިން ވެއްޖެ ކަމަށް ވިދާލުވެ މަސްކް ވަނީ އިނގިރޭސި ބޮޑުވަޒީރު މަގާމުން ދުރުކޮށް ހައްޔަރުކުރުމަށް ވެސް ގޮވާލައްވާފަ އެވެ.
އީލޮން މަސްކްގެ އަމިއްލަ މައިކްރޮބްލޮގިން ޕްލެޓްފޯމް އެކްސްގައި، ގައުމުތަކުގެ ދާޚިލީ ވާހަކަތައް ޕޯސްޓްކުރައްވައި، އިނގިރޭސިވިލާތުގެ ވެރިންގެ ކިބައިން އާންމު ރައްޔިތުން މިނިވަންކުރަން ޖެހޭ ކަމަށް ވެސް މަސްކް ވިދާޅުވި އެވެ.
މަސްކްގެ މި ވާހަކަތާ ގުޅިގެން އިނގިރޭސިވިލާތުގައި ހުންނެވި އެމެރިކާގެ ސަފީރު، ގާނޫންހަދާ މަޖިލީހަށް ނުވަތަ ޚާރިޖީ ވުޒާރާއަށް ހާޒިރުކުރުމަށް، މަޖިލީހުގެ ބައެއް މެމްބަރުން ވަނީ ގޮވާލައްވާފަ އެވެ.
އިނގިރޭސިވިލާތް މިހާރު އޮތީ ދާޚިލީ ހަނގުރާމައެއްގެ ތެރޭގައި ކަމަށް ވިދާޅުވެ މަސްކް ވިދާޅުވީ މުޅި ގައުމުގައި ހުޅުހިފާނީ ހަމަ ކުއްލިއަކަށް ކަމަށެވެ.
އީލޮން މަސްކް މި ފަދައިން ފާޑުވިޔާޅުވި އަނެއް ލީޑަރަކީ ޖަރުމަނުގެ ޗާންސެލަރު އޮލަފް ޝޯލްޒް އެވެ. މަސްކް ވިދާޅުވި ގޮތުނު އޮލަފް ޝޯލްޒް އަކީ ޖަރުމަނު ކަހަލަ ގައުމެއްގެ ޗާންސެރަލުގެ މަގާމުގައި ބަހައްޓަން ހެޔޮވާވަރުގެ މީހެއް ނޫނެވެ.
އިނގިރޭސިވިލާތުގެ ސިޔާސީ ލީދަރުން ދެކޭ ގޮތުގައި އެމެރިކާގައި ކުރިއަށް އޮތް ޓްރަމްޕް ސަރުކާރުގައި އީލޮން މަސްކްގެ ދައުރު ވަރަށް ބޮޑުވާނެ އެވެ. އަދި އޭނާގެ ސަބަބުން އިނގިރޭސިވިލާތާއި އެމެރިކާއާ ގުޅުން ގޯސްވުމަކިވެސް އޮތް ފުރުސަތެކެވެ.