ބޯހިޔާވަހި ކަމުގެ މަޝްރޫއުގެ ދަށުން މާލެ ސަރަހައްދުގައި ފަހި ދިރިއުޅުން ކޯޕަރޭޝަން (އެފްޑީސީ)ގެ ފަރާތުން އިތުރު 13،000 ހައުސިން ޔުނިޓް އެޅުމަށް ނިންމައިފި އެވެ.
އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ މިމަޝްރޫއުގައި ހިމެނޭ 3،000 ހައުސިން ޔުނިޓް އެޅުމަށް މިއަހަރުގެ ކުރީކޮޅު ސްރީލަންކާގެ ކުންފުންޏަކާއި އެކު އެއްބަސްވުމެއްގައި ސޮއިކޮށްފައިވާ ކަމަށެވެ.
މީގެއިތުރުން އަނެއް 10،000 ހައުސިން ޔުނިޓް އެޅުމަށް ބޭރުގެ އިތުރު ދެ ކުންފުންޏަކާއި އެކުވެސް ފްރޭމްވޯކް އެއްބަސްވުމެއްގައި ސޮއި ކޮށްފައިވާ ކަމަށް ހަމްދާން ވިދާޅުވި އެވެ.
އޭނާ ވިދާޅުވި ގޮތުގައި މިމަޝްރޫއު ކުރިއަށް ގެންދާނީ ބޭރުގެ ފަރާތްތަކުގެ ލޯނު އެހީގައި ކަމަށްވާތީ މިހާރު ދަނީ މިމަޝްރޫއަށް ފައިސާ ހޯދުމުގެ މަސައްކަތް ކުރަމުންނެވެ.
"ކުރިއަށް އޮތް ހަތަރު މަސް ދުވަހުގެ ތެރޭގައި މަޝްރޫއުތައް އިފްތިތާހްކުރާނެ. ސޯޝަލް ހައުސިން ބޭނުންވާ ކޮންމެ ރަށެއްގައި އެފަދަ މަޝްރޫއުތައް ކުރިއަށް ގެންދިއުމަށްވެސް އަޅުގަނޑުމެން މިތިބީ ތައްޔާރަށް،" ހަމްދާން ވިދާޅުވި އެވެ.
މިއީ ލޯނު ނަގައިގެން ހިންގާ މަޝްރޫއު ތަކަކަށް ވާތީ ކުރިއަށް އޮތް ދެ މަސް ދުވަހުގެ ތެރޭގައި މަޝްރޫއުތައް ކުރިއަށް ގެންދިއުމުގެ ހުއްދައަށް އެދި ސަރުކާރަށް ހުށަހަޅާނެ ކަމަށްވެސް ހަމްދާން ވިދާޅުވި އެވެ.
އެފްޑީސީ އިން ހުޅުމާލޭގެ ދެވަނަ ފިޔަވަހީގައި އަޅަމުންދާ 4،000 ހައުސިން ޔުނިޓްގެ މަސައްކަތްވެސް މިހާރު ވަނީ ނިމުމަކާ ކައިރިވ ވެފަ އެވެ. މިއީ އެ ކުންފުނީގެ މިފަދަ ފުރަތަމަ މަޝްރޫއެވެ.