ރާއްޖޭގެ ހަތަރު ސަރަހައްދެއްގައި ކުރޫޒުލައިނާ ޓާމިނަލް ތަކެއް ހެދުމަށް މޯލްޑިވްސްޕޯޓްސް ލިމިޓެޑް (އެމްޕީއެލް) އިން ނިންމައިފި އެވެ.
އެމްޕީއެލްގެ ރިސާޗް އެންޑް ޑިވެލޮޕްމަންޓް ކޮންސަލްޓެންޓް އަނިލް އާދަމް ވިދާޅުވީ މިމަޝްރޫއު ކުރިއަށް ގެންދިއުމަށްޓަކައި ގްރީސްގެ ކުންފުންޏަކާ އެކު ފީސިބިލިޓީގެ މަސައްކަތް ކުރަމުންދާ ކަމަށެވެ.
އަނިލް ވިދާޅުވީ ކުރޫޒުލައިނާ ޓާމިނަލްތައް އެޅުމަށް ނިންމާފައިވަނީ ހއ. އުލިގަމާއި ލ. ފޮނަދޫ އާއި އައްޑޫސިޓި ހިތަދޫގެ އިތުރުން މާލެ ސަރަހައްދުގައި ކަމަށެވެ.
މިސައްކަތް ކުރާނީ މަސައްކަތުގެ ފަންނީ މީހުންގެ ލަފައާއި މަޝްވަރާގެ މަތިން ކަމަށްވެސް އަނިލް ވިދާޅުވި އެވެ.
"މިކަންކަން ހަގީގަތަކަށް ހެދޭނެ ކަމަށް އުއްމީދުކުރަން،" އަނިލް ވިދާ ޅުވި އެވެ.
މާލޭ ސަރަހައްދުގައި އަޅާ ކުރޫޒް ޓާމިނަލް ޕްލޭން ކޮށްފައިވާ ކަމަށާއި އެގޮތުން މާލޭގެ ވިޔަފާރި ބަނދަރު ތިލަފުށްޓަށް ބަދަލުކުރުމުން އެތަނުގައި ކުރޫޒް ޓާމިނަލެއް އެޅުމުގެ މަސައްކަތް ކުރަން މިހާރު ތައްޔާރުވަމުންދާ ކަމަށްވެސް އަނިލް ވިދާޅުވި އެވެ.
ރާއްޖެއަކީ މުޅި ދުނިޔޭގައިވެސް ފަތުރުވެރިކަމުގެ ދާއިރާގައި އެންމެ ފާހަގަކޮށްލެވޭ މަންޒިލެވެ.
ކުރޫޒްތަކުގައި އެތައް ފަތުރުވެރިޔަކު ރާއްޖެ އަންނައިރު ކުްރޫޒުތަކަށް ހިދުމަތް ދިނުމަށް ހާއްސަ ޓާމިނަލްތަކެއް ނެތުމަކީ ފަތުރުވެރިން ފާހަގަކުރާ މައްސަލަ އެކެވެ.