ރައްޔިތުންގެ މަޖިލީހުގެ މިއަދުގެ ޖަލްސާ ކެންސަލްކޮށްފި އެވެ.
ޖަލްސާ ކެންސަލް ކުރި ވަކި ސަބަބެއް މަޖިލީހުގެ އިދާރާ އިން މީޑިއާއަށް ސާފުކޮށްދީފައެއް ނުވެ އެވެ.
މަޖިލީހުގެ އިއްޔެގެ ޖަލްސާ ނިންމާލިއިރު ރިޔާސަތުގައި އެ ވަގުތު އިންނެވި މަޖިލީހުގެ ނައިބް ރައީސް އަހްމަދު ނާޒިމު ވަނީ މިއަދު ހެނދުނު 9:00 ހާއިރު މަޖިލީހުގެ ޖަލްސާއެއް އޮންނާނެ ކަމަށް އިއުލާންކޮށްފަ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ކެންސަލް ކުރިއިރު މަޖިލީހުގެ މެޖޯރިޓީ އޮންނަ ވެރިކަން ކުރާ ޕީއެންސީގެ މެންބަރުންގެ ފުރިހަމަ ތާއީދާ އެކު މަޖިލީހުގެ މިއަހަރުގެ ފަހު ދައުރު ވަނީ ދިގުދަންމާލާފަ އެވެ.
މަޖިލީހުގެ ގަވައިދުގައިވާ ގޮތުންނަމަ މަޖިލީހުގެ މިއަހަރުގެ ފަހު ދައުރުގެ ޖަލްސާތައް މިދިޔަ ނޮވެމްބަރު މަހުގެ ނިޔަލަށް ނިމޭނެ އެވެ. ނަމަވެސް މަޖިލީހުން ވަނީ ކުރިއަށް ޑިސެމްބަރު 15 ވަނަ ދުވަހުގެ ނިޔަލަށް ދައުރު ދަންމާލާފަ އެވެ.