ސޫރިއާގެ ސަރުކާރާ ދެކޮޅު ހަނގުރާމަވެރިން އެގައުމުގެ ވެރިރަށް ދިމިޝްގު ވަށާލައިފި އެވެ.
ސޫރިއާގެ ދާހިލީ ހަނގުރާމަ މިހާރު އައިސްފައި މިވަނީ މުޅިން އަ އަދި ވަރަށް ނުރައްކާތެރި މަރުހަލާ އަކަށެވެ.
އިދިކޮޅު ހަނގުރާމަވެރިން ވަނީ ރޭވުންތެރި ހަމަލާތަކެއް ފަށައި، ސޫރިއާގެ ސަރުކާރު ފަހަތަށް ޖައްސާލުމަށްފަހު ސިފައިންގެ ފައުޖުތަކަށް މާޔޫސްކަން ގެނުވާފަ އެވެ.
ސީރިއާގެ މީޑިއާ ޗެނަލްތަކުން ރިޕޯޓްކޮށްފައިވާ ގޮތުގައި ހަނގުރާމަވެރިން ސީރިއާގެ އެކި ސިޓީތަކަށް ވަދެގަނެ، ބައްޝާރުލް އަސަދުގެ ސަރުކާރަށް ވަރުގަދަ ލޮޅުމެއް ވަނީ އަރުވާލާފަ އެވެ. ސަރުކާރުގެ ސިފައިން މިހާރު ވަނީ ދިފާއީ ހަރަކާތްތަކެއް ފަށާފަ އެވެ.
ހަނގުރާމަވެރިން މިހާރު ކުރަމުންދަނީ ސީރިއާގެ ގައުމުގެ އެންމެ މުހިއްމު ސިޓީތައް ކޮންޓްރޯލަށް ގެނައުމުގެ މަސައްކަތެވެ. އެގޮތުން މިހާރު އެމީހުންގެ ބާރުގެ ދަށަށް ހޮމްސް ސިޓީ ގެންގޮސްފައި ވެއެވެ. އެއީ ސީރިއާގެ އެންމެ ބޮޑު އެއް ސިޓީ އެވެ.
އިރާގު ސަރުކާރުން އާންމުކޮށްފައިވާ މައުލޫމާތަށް ބަލާއިރު 2000 އަށް ވުރެ ގިނަ ސީރިއާގެ ސިފައިން ވަނީ އެ ގައުމު ދޫކޮށް އިރާގަށް ވަގަށް ވަދެފަ އެވެ.
ރައީސް އަސަދު ފިއްލެވި ކަމަށް ބުނާ ވާހަކަތައް ސީރިއާ ސަރުކާރުން ދޮގުކުރެ އެވެ. އެހެންނަމަވެސް ސިޔާސީ މަސްރަހު ދިރާސާކުރާ ފަރާތްތަކުން ދެކޭ ގޮތުގައި ވެރިރަށް ދިމިޝްގު، ހަނގުރާމަވެރިންގެ ކޮންޓްރޯލްގެ ދަށަށް ގޮސްފިނަމަ އަސަދުގެ ވެރިކަން ނިމުމަކަށް އައުމަކީ ވަރަށް އެކަށީގެންވާ ކަމެކެވެ.