ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކ. ގާފަރަށް ވަޑައިގެންފި އެވެ.
އެމަނިކުފާނު ގާފަރަށް ވަޑައިގަތުމުން ރަށުގެ ކައުންސިލަރުންނާއި ދައުލަތުގެ އިދާރާތަކުގެ މުވައްޒަފުންނާއި އާންމު ރައްޔިތުން ވަނީ އެމަނިކުފާނަށް ހޫނު މަރުހަބާއެއް ވަނީ ދަންނަވާފަ އެވެ.
ރައީސް ގާފަރަށް ކުރައްވާ މިދަތުރުފުޅުގައި އެމަނިކުފާނު މިހާރު ވަނީ ގާފަރު ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާ ބައްދަލުކުރައްވާފަ އެވެ.
މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި ރަށުގެ ތަރައްގީއަށް ބޭނުންވާ ކަންތައްތައް ރައީސްއާ ހިއްސާކުރައްވާފަ އެވެ. އެގޮތުން ރަނގަޅު ފެންވަރެއްގެ ސިއްހީ މަރުކަޒެއް ގާއިމުކުރުމުގެ މަސައްކަތް އަވަސްކޮށްދިނުމަށާއި، ރަށުގައި ގޯތި ދޫނުކުރާތާ 18 އަހަރު ވެފައިވުމުން ރަށުގެ ގިނަ ރައްޔިތުން ގޯތި ބޭނުންވާތީ ބިން ހިއްކުމުގެ މަޝްރޫއެއް ފަށައިދިނުމަށް ކައުންސިލަރުން އެދިވަޑައިގެންނެވި އެވެ. މީގެ އިތުރުން ސްކޫލުގެ ޖާގައިގެ ދަތިކަމާއި، މަސްވެރިންގެ ފަރާތުން ހުރި ބައެއް ކަންބޮޑުވުންތައްވެސް ހިއްސާކުރެއްވި އެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުން ވަނީ ބަޖެޓުގެ ދަތިކަމާއި ހޭންޑް ބޯލް ދަނޑު ނުނިމި އޮތުމުން ކަންބޮޑުވުން ފާޅުކުރައްވާފަ އެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ކައުންސިލަރުން ފާހަގަކުރެއްވި ކަންކަމަށް ސަރުކާރުން ކުރަމުންދާ މަސައްކަތްތަކުގެ މައުލޫމާތާއި، ތަރައްގީއަށް ކުރިއަށްގެންދާ މަޝްރޫއުތަކުގެ އެންމެ ފަހުގެ މައުލޫމާތުތައް ހިއްސާކުރައްވާ ފައެވެ.
މިބައްދަލުކުރެއްވުމުގައި ރައީސް ވިދާޅުވީ އެމަނިކުފާނު ވައުދުވެވަޑައިގެންފައިވާ ކަންކަން ކޮށްދެއްވާނެ ކަމަށެވެ. އަދި ތައުލީމާއި ސިއްހީ ދާއިރާގެ މަޝްރޫއުތައް މިއަންނަ އަހަރު ފެށުމަށް ހާއްސަ އިސްކަމެއް ދެއްވާނެ ކަމަށެވެ. ހަމައެއާއެކު ރަށުގެ ތަރައްގީގެ ކަންކަން ތާށިނުވެ ކުރިއަށް ގެންދިއުމަށް އަހަންމިއްޔަތު ކަމެއް ދެއްވާނެ ކަމަށްވެސް ވިދާޅުވި އެވެ.
ރައީސް މުއިއްޒު ގާފަރަށް ވަޑައިގަތީ އއ. އަތޮޅުގެ ތިން ރަށަކަށް އިއްޔެ ވަޑައިގަތުމަށްފަހު އެެވެ.