މޯލްޑިވްސް ކަސްޓަމްސް ސާވިސްގެ ސައުތު ރީޖަނަލް ހެޑް އޮފީސް އިމާރާތް އައްޑޫ ސިޓީގެ މަރަދޫގައި މިއަދު ރަސްމީކޮށް ހުޅުވައިފި އެވެ.
މި އިމާރާތް މިއަދު ހުޅުއްވައި ދެއްވީ ކަސްޓަމްސްގެ ސައުތު ރީޖަނަލް ހެޑް އޮފީސް އިމާރާތުގައި މިއަދު ބޭއްވި ހާއްސަ ރަސްމިއްޔާތެއްގައި ކަސްޓަމްސްއާ ހަވާލުވެ ހުންނަވާ ހޯމްލޭންޑް ސެކިއުރިޓީ މިނިސްޓަރު އަލީ އިހްސާން އާއި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ އެވެ.
މިރަސްމިއްޔާތުގައި އިހްސާން ވިދާޅުވީ އައްޑޫ ސިޓީގެ ވިޔަފާރިތައް ފުޅާވެ، އެކްސްޕޯޓް އިމްޕޯޓް ކުރާ މިންވަރު އިތުރުވެގެންދާއިރު އެ ސިޓީގައި ގާއިމުކުރެވުނު ކަސްޓަމްސްގެ ރީޖަނަލް އޮފީހުގެ ސަބަބުން ކަސްޓަމްސް އިން ފޯރުކޮށްދޭންޖެހޭ ހިދުމަތްތައް އިތުރަށް ތަރައްގީ ވެގެންދާނެ ކަމަށެވެ.
"މިއޮފީހުގެ ސަބަބުން އައްޑޫ ސިޓީގެ ވިޔަފާރި ބަނދަރުތައް ބެލެހެއްޓުން އިތުރަށް ހަރުދަނާ ވެގެންދާނެ،" މިނިސްޓަރު ވިދާޅުވި އެވެ.
މި ރަސްމިއްޔާތުގައި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާ ވިދާޅުވީ އަލަށް މި ހުޅުވުނު ކަސްޓަމްސްގެ ސައުތު ރީޖަނަލް ހެޑް އޮފީހުގެ ސަބަބުން އައްޑޫގައި ކަސްޓަމްސްގެ ހިދުމަތްތައް އިތުރަށް ހަރުދަނާވެ، ހިދުމަތްތައް އަވަސްވެގެން ދާނެ ކަމަށެވެ. އަދި މި ސަރަހައްދުގައި ގާއިމުކޮށްފައިވާ ބަނދަރުތައް ބެލެހެއްޓުން އޮފީހާ އެކު އިތުރަށް ވަރުގަދަކުރެވިގެންދާނެ ކަމުގައިވެސް ވިދާޅުވި އެވެ.
"މިއޮފީހުގައި މައިގަނޑު ގޮތެއްގައި ކުރިއަށްދާނީ އައްޑޫގެ އެކި ބަނދަރުތަކަށް ގެނެވޭ މުދަލުގެ ލިޔެކިޔުން ނިންމުމުގެ މަސައްކަތާއި މުވައްޒަފުންނަށް ފުޅާދާއިރާއެއްގައި ތަމްރީން ޕްރޮގްރާމްތައް ހިންގުމަށް ހާއްސަ ތަންތަންވެސް މި އިމާރާތުގައި ހުންނާނެ،" ދިޔާނާ ވިދާޅުވި އެވެ.
ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގެ މަސައްކަތް 2021 ވަނަ އަހަރު ފެށީ އެސްޖޭ ޓްރޭޑް ޕްރައިވެޓް ލިމިޓެޑްއާ ހަވާލުކޮށްގެންނެވެ. މިއިމާރާތް ގާއިމުކުރުމަށް 22.3 މިލިއަން ރުފިޔާ ދައުލަތުގެ ބަޖެޓުން ހަރަދުކޮށްފައިވެ އެވެ. ތިން ބުރީގެ މި އިމާރާތުގައި އިދާރީ އޮފީހަކާއި، ސްޓާފް އެކޮމޮޑޭޝަން ބައެއްގެ އިތުރުން ރީޖަނަލް ޓްރޭނިން ސެންޓަރެއް ގާއިމުކޮށްފައިވެ އެވެ.