ވޭޕްގެ ހުރިހާ މުއާމަލާތެއް މަނާކުރީ ގައުމުގެ ދަރިން އެ ވަބާއިން ސަލާމަތް ކޮށްގެން ނޫނީ ރައްކާތެރިކަމާއި ތަރައްގީ ޔަގީން ނުވާނެތީ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އދ. މަހިބަދޫގައި އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވަނީ ރޭ 12:00 އިން ފެށިގެން ރާއްޖޭގައި ވޭޕްގެ ވިޔަފާރި ކުރުމާއި ބޭނުންކުރުން ގާނޫނީ ގޮތުން މަނާކޮށްފައިވާކަން ފާހަގަކުރައްވާފަ އެވެ.
ރާއްޖޭގައި މީގެ ކުރިން އިލެކްޓްރޯނިކް ސިނގިރޭޓުގެ ނުވަތަ ވޭޕްގެ ވިޔަފާރި ކުރަމުން ގެންދިޔައީ ގާނޫނީ އިމުގެ ތެރެއިން ހުއްދަ އޮވެގެން ނަމަވެސް އެކަމުގެ ސަބަބުން ގައުމަށް ބޮޑެތި ގެއްލުންތަކެއް ކުރިމަތިވަމުންދިޔަ ކަމަށް ރައީސް މުއިއްޒު ވިދާޅުވި އެވެ.
"ހާލުގެ ދުލުން އެދެމުން ދިޔައީ ގައުމުގެ ދަރިން، ވޭޕްގެ ވަބާއިން ސަލާމަތް ކޮށްދިނުމަށް،" ރައީސް ވިދާޅުވި އެވެ.
ރައީސް ވިދާޅުވީ ދިވެހި މުޖުތަމައުތަކަކީ ވޭޕާއި މަސްތުގެ ވަބާތަކުން ސަލާމަތްކުރެވިފައިވާ މުޖުތަމައުތަކަކަށް ހަދަންޖެހޭ ކަމަށާއި ސިއްހީ ގޮތުން ޒުވާނުންނާއި އާންމުން ސަލާމަތްތެރިކަމާއެކު ތިބެގެން މެނުވީ ގައުމަށްވެސް ކޮށްދެވޭނެ ކަމެއް ނޯންނާނެ ކަމަށެވެ.
މުޖުތަމައުގައި ފެތުރިފައި އޮތް ނުރަނގަޅު އާދަތަކުން ސަލާމަތްވެވެން އޮތީ އަޒުމާއެކު މަސައްކަތްކޮށްގެން ކަމަށާއި ގާނޫނުތަކެއް ހުރިނަމަވެސް ފޫނުބެދޭ އެތައް ކަމެއް ހުރި ކަމުގައި ރައީސް މުއިއްޒު ވިދާޅުވި އެވެ.
ބަޔަކު ކުށްވެރި ކުރުމަކީ ސަރުކާރުން އެދޭ ގޮތް ނޫން ކަމަށާއި ބޭނުންވަނީ މަސްތުގެ ބަވާއާއި އެ ނޫންވެސް ގޮތްގޮތުން ކުށުގެވެށީގައި ބަނދެވިފައިވާ މީހުން އެކަންކަމުން ސަލާމަތްކުރުން ކަމުގައި ރައީސް ވިދާޅުވި އެވެ.