ނައިބް ރައީސް ހުސައިން މުހައްމަދު ލަތީފް، "ޗައިނާ-އިންޑިއަން އޯޝަން ރީޖަން ފޯރަމް އޮން ބްލޫ އިކޮނޮމީ ޑިވެލޮޕްމަންޓް ކޯޕަރޭޝަން"ގެ ތިންވަނަ ބައްދަލުވުމުގައި ބައިވެރިވެވަޑައިގަތުމަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މިއަދު ރާއްޖެއަށް ވަޑައިގެންފި އެވެ.
ޗައިނާގެ ޔުނާން ޕްރޮވިންސްގެ ކުންމިންގައި މިމަހުގެ 15 އިން 17 އަށް ކުރިއަށްދިޔަ މި ފޯރަމަކީ ރާއްޖެއިން ކޯ-ހޯސްޓްކުރި ފޯރަމެކެވެ.
ނައިބް ރައީސްގެ މި ދަތުރުފުޅުގައި އެމަނިކުފާނު ވަނީ "ޗައިނާ-އިންޑިއަން އޯޝަން ރީޖަން ފޯރަމް އޮން ބްލޫ އިކޮނޮމީ ޑިވެލޮޕްމަންޓް ކޯޕަރޭޝަން"ގެ ތިންވަނަ ބައްދަލުވުން އިފްތިތާހުކުރެއްވުމުގެ ރަސްމިއްޔާތުގައި ވާހަކަފުޅުދައްކަވާފަ އެވެ. އެގޮތުން ދުނިޔެ ހޫނުވާ މިންވަރު ކުޑަކޮށް، ކަނޑުގެ ދިރުންތައް ހިމާޔަތްކުރުމަށްޓަކައި ހުރިހާ ގައުމުތަކުގެ ވެއްޓަށް ފެތޭ މޫސުމާ ގުޅޭ ސިޔާސަތެއް މުހިއްމު ކަމުގައި ވިދާޅުވި އެވެ.
މި ދަތުރުފުޅުގައި ނައިބް ރައީސް ވަނީ ޗައިނާ ސަރުކާރުގެ އިސް ބޭފުޅުންނާވެސް ބައްދަލުކުރައްވާފަ އެވެ.
ނައިބް ރައީސްގެ މި ދަތުރުފުޅަކީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީއައިޑީސީއޭ)ގެ ދައުވަތަކަށް ކުރެއްވި ދަތުރުފުޅެކެވެ.
