މެލޭޝިއާގެ 2 ރައްޔިތުން ކަމުގައިވާ މުހައްމަދު ފާރިކް ބިން އާމިންއާއި މުހައްމަދު ނަޒީރު ބިން ލެޕް އެމެރިކާގެ ގުއަންޓަނާމޯ ބޭ ޖަލުގައި 18 އަހަރު ހޭދަކުރުމަށްފަހު މިނިވަންކުރުމުން ބުދަ ދުވަހުގެ ރޭ މެލޭޝިއާއަށް އެނބުރި ހިނގައްޖެ އެވެ.
މެލޭޝިއާގެ އިންސްޕެކްޓާ ޖެނެރަލް އޮފް ޕޮލިސް ރަޒަރުދީން ހުސައިން ވިދާޅުވި ގޮތުގައި މި ދެ މީހުން އެނބުރި އައިއިރު ތިބީ ރަނގަޅު ސިއްހަތެއްގައި ކަމަށާއި، އެ މީހުންގެ އާއިލާއާ އެކު އަލުން ބައްދަލުވުމުން އުފާވެފައިވާ ކަމަށެވެ.
މި ދެ މީހުން ހައްޔަރުކުރީ ދެހާސް ދެވަނަ އަހަރު އިންޑޮނީޝިއާގެ ބާލީގައި ބޮންތަކެއް ގޮއްވާލައި 200 އަށް ވުރެ ގިނަ މީހުން މަރާލި އަނިޔާވެރި އަމަލާ ގުޅިގެންނެވެ. މި ހަމަލާއާ ގުޅުންހުރި ދައުވާތަކަށް މި ދެމީހުން އިއުތިރާފުވެފައިވެ އެވެ.
މެލޭޝިއާ ފުލުހުންގެ ވެރިޔާ ވިދާޅުވި ގޮތުގައި މި ދެމީހުން މުޖުތަމައަށް އަނބުރާ ގެނައުމުގެ ކުރިން ފުރިހަމަ ރިހިބިލިޓޭޝަން ޕްރޮގްރާމެއް ފުރިހަމަ ކުރާނެ އެވެ.
ޕެންޓަގަން އިން ބުނާ ގޮތުގައި މި ދެމީހުން ވަނީ ބާލީ ބޮމުގެ ހަމަލާގެ މައި ސިކުނޑި ކަމަށްވާ އެންސެޕް ނުރުޖަމާން (ހަމްބާލީ)އާ ދެކޮޅަށް ހެކިބަސް ދީފަ އެވެ. ހަމްބާލީ މިވަގުތު ހުރީ ގުއަންޓަނާމޯ ބޭގައި ޝަރީއަތުގެ މަރުހަލާ ގައެވެ.
މިއާއެކު، ގުއަންޓަނާމޯ ބޭގައި މިހާރު ބަންދުކޮށްފައި ތިބީ 27 މީހުންނެވެ. މިއީ 9/11ގެ ހަމަލާއަށްފަހު އެމެރިކާ އިން ފެށު "ޓެރަރިޒަމާ ދެކޮޅު ހަނގުރާމަ" ގައި 800 އަށް ވުރެ ގިނަ މީހުން ބަންދުކުރި ތަނެކެވެ.
އެމްނެސްޓީ އިންޓަނޭޝަނަލް އިން ބުނީ ގުއަންޓަނާމޯ ބޭ ޖަލަކީ އެމެރިކާގެ އިންސާނީ ހައްގުތަކުގެ ރެކޯޑުގައި ހުރި "ދުވަހަކުވެސް ނުފިލާވަރުގެ ހަޑި ލައްގަނޑެއް" ކަމަށެވެ.