ހުޅުމާލޭގައި ހުކުރު ދުވަހު ބޭއްވި ރާއްޖޭގެ އެންމެ އުފާވެރި 5ކޭ ދުވުން -- އުރީދޫ ފަން ރަންގައި 6،500 އަށްވުރެ ގިނަ ބައިވެރިން ބައިވެރިވި ކަމަށް އުރީދޫ މޯލްޑިވްސް އިން ބުނެފި އެވެ.
މި ދުވުން ޝަރަފުވެރިކޮށް ދެއްވީ ނައިބުރައީސް ހުސައިން މުހައްމަދު ލަތީފު އެވެ.
ޖުމްލަ ފަސް ކިލޯ މީޓަރުގެ މި ދުވުމުގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ވަނީ ކުރިއަށް ގެންގޮސްފަ އެވެ.
މިއީ ދުޅަހެޔޮ ދިރިއުޅުމެއް އަށަގެންނެވުމަށާއި ރާއްޖޭގެ އެކި ކަންކޮޅުތަކުގައި ދިރިއުޅޭ އާއިލާތަކަށާއި ފަރުދުންނަށް ހަނދާން ނައްތާނުލެވޭ އުފާވެރި މަޖާ ވަގުތުކޮޅެއް ގެނެސް ދިނުމަށް އުރީދޫ އިން ބާއްވާ ހަރަކާތެކެވެ.
އުރީދޫ މޯލްޑިވްސްގެ ޗީފް އެގްޒެކެޓިވް އޮފިސަރު ހާލިދު އަލް ހަމާދީ ވަނީ އުރީދޫ ފަން ރަން އަށް ލިބުނު ތަރުހީބު ފާހަގަކުރައްވާފަ އެވެ.
އުރީދޫ ފަން ރަން އަށް މުޖުތަމައުގެ ފަރާތުން ބޮޑު ތަރުހީބެއް ލިބުމުން އެކަމާ އުފާވާ ކަމަށް އޭނާ ވިދާޅުވި އެވެ.
ހުޅުމާލެ އެޑިޝަންގެ ބޮޑު ކާމިޔާބީއަށް ފަހު އުރީދޫން ވަނީ ކުރިއަށް އޮތް ފަން ރަން ފުވައްމުލައް ސިޓީގެ ރީތި ހިތްގައިމު މާހައުލުގައި ބާއްވަން ނިންމާފައިވާކަން އިއުލާނުކޮށްފަ އެވެ.
އުރީދޫ އިން ބުނީ ފުވައްމުލައް ސިޓީގައި ބާއްވާ ފަން ރަންގެ މައުލޫމާތު އުރީދޫގެ ސޯޝަލް މީޑިއާގައި ހިއްސާކުރަމުންދާނެ ކަމަށެވެ.
އުރީދޫ މޯލްޑިވްސް އިން ވަނީ ހުޅުމާލޭގައި ކުރިއަށް ގެންދިޔަ ފަން ރަން އަކީ ހަނދާން ނައްތާނުލެވޭ ފަދަ ތަޖުރިބާއަކަށް ހެދުމުގައި ބައިވެރިވި ވޮލަންޓިއަރުންނާއި ޕާޓްނަރުންނަށް ޝުކުރު އަދާކޮށްފަ އެވެ.