ސޫރިއާގައި އިންތިހާބެއް ބޭއްވޭ ފަދަ މާހައުލެއް ގާއިމުކުރުމަށް ގާތްގަނޑަކަށް ހަތަރު އަހަރު ދުވަހުގެ މުއްދަތެއް ނަގާނެ ކަމަށް ހަޔާތު ތަހްރީރު އަލް-ޝާމް (އެޗްޓީއެސް)ގެ ވެރިޔާ އަބޫ މުހައްމަދު އަލް-ޖޫލާނީ ވިދާޅުވެއްޖެ އެވެ.
ސައުދީ އަރަބިއްޔާގެ އަލް-އަރަބިއްޔާ ޓީވީއަށް ދެއްވި ހާއްސަ އިންޓަވިއުއެއްގައި އަލް-ޖޫލާނީ ވިދާޅުވީ އާ ގާނޫނުއަސާސީއެއް އެކުލަވާލުމަށް އެކަނިވެސް ދެތިން އަހަރު ދުވަހުގެ މުއްދަތެއް ނަގާނެ ކަމަށެވެ. އޭގެ ފަހުން އިންތިހާބުގެ އެހެން މަރުޙަލާތަކަށް އިތުރު ވަގުތު ބޭނުންވާނެ ކަމަށެވެ.
އދގެ ސަލާމަތީ މަޖިލީހުން ވަނީ ސޫރިއާގެ ހުރިހާ ރައްޔިތުންނަށްވެސް ހަމަހަމަކަމާއެކު ބައިވެރިވެވޭ، ޑިމޮކްރެޓިކް ސިޔާސީ ނިޒާމެއް ގާއިމުކުރުމަށް ގޮވާލާފަ އެވެ.
އެމެރިކާއާއި ބައެއް ހުޅަނގުގެ ގައުމުތަކުން އެޗްޓީއެސްއާ މެދު މިހާރު ކަންބޮޑުވުން ފާޅުކުރަމުންދަނީ އެ ޖަމާއަތުން ކުރިން އަލް-ޤައިދާއާ އެކު އޮތް ގުޅުމެއް އޮތުމުންނެވެ.
އެހެންނަމަވެސް ސޫރިއާގެ ސަރުކާރު ހިންގުމާ ހަވާލުވުމަށްފަހު އެޗްޓީއެސް އިން ވަނީ އެ ޖަމާއަތުގެ ސިޔާސަތުތަކަށް ބޮޑެތި ބަދަލުތަކެއް ގެނެސްފަ އެވެ. އަލް-ޖޫލާނީ ވަނީ ހުރިހާ ދީންތަކަށްވެސް އިހްތިރާމްކޮށް، އެންމެންގެ ހައްގުތައް ރައްކާތެރިކޮށްދޭނެ ކަމުގެ ޔަގީންކަން ދެއްވާފަ އެވެ.
މީގެއިތުރުން އެމެރިކާއިން ސޫރިއާގެ މައްޗަށް އަޅާފައިވާ ދަތިކުރުމުގެ ފިޔަވަޅުތައް ނެގުމަށް އަލް-ޖޫލާނީ ވަނީ ގޮވާލައްވާފަ އެވެ. މި ގޮވާލެއްވުން އައީ އެ ޖަމާއަތުގެ ހަނގުރާމަވެރިން ގިނަ ސަރަހައްދުތަކެއް ހިފުމާ ގުޅިގެން، ސޫރިއާގެ ކުރީގެ ރައީސް ބަޝާރު އަލް-އަސަދު ގައުމު ދޫކުރައްވައި ވަޑައިގެންނެވުމާ ގުޅިގެންނެވެ.