އަހަރުގެ ފުރަތަމަ ދުވަހު އެންމެ ގިނަ މަސް ގަތީ ބޯޓުތަކަށް

މިއަހަރުގެ ފުރަތަމަ ދުވަހު އެންމެ ގިނަ މަސް ކިރާފައިވަނީ މަސް ބޯޓުތަކަށް ކަމަށް މިފްކޯ އިން ހާމަކޮށްފި އެވެ.

މިފްކޯގެ ތަފާސްހިސާބުތަކަށް ބަލާއިރު އިއްޔެ މިފްކޯގެ މަސް ބޯޓުތަކަށް ޖުމްލަ 221.13 މެޓްރިކްޓަނުގެ މަސް ކިރާފައިވެ އެވެ.

ދެވަނައަށް އެންމެ ގިނައިން މަސް ކިރާފައިވަނީ ގއ. ކޫއްޑޫގައި ހުންނަ ފިޝަރީޒް ކޮމްޕްލެކްސް އަށެވެ. އެއީ ޖުމްލަ 80.72 މެޓްރިކް ޓަނުގެ މަހެވެ. އައްޑޫ ފިޝަރީޒް ކޮމްޕްލެކްސްއަށް ކިރާލި 9.4 މެޓްރިކްޓަނުގެ މަހާ އެކު އެ ތަން އޮތީ ލިސްޓްގެ ތިންވަނައިގައެވެ.

ޅ. ފެލިވަރު ފެކްޓަރީއަށް އިއްޔެ އެއްވެސް ވަރަކަށް މަސް ކިރާފައެއް ނުވެ އެވެ. އެކަމަކު ފެލިވަރު ކައިރީގައި އޮތް ތިން މަސް ބޯޓަށް އިއްޔެ އެކަނިވެސް 58 މެޓްރިކްޓަނުގެ މަސް ކިރާފައިވެ އެވެ.

މިފްކޯއަށް އިއްޔެ އެންމެ ގިނަ މަސް ގަނެފައިވަނީ ގއ. އަތޮޅާއި ގދ. އަތޮޅުގެ ދޯނިތަކުންނެވެ. ގއ. އަތޮޅުގެ 20 ދޯންޏަކުން 80.7 މެޓްރިކް ޓަނުގެ މަސް ގަނެފައިވާއިރު ގދ. އަތޮޅުގެ 22 ދޯންޏަކުން 92.6 މެޓްރިކް ޓަނުގެ މަސް ގަނެފައިވެ އެވެ.

ލިސްޓުގެ ދެވަނައިގައި ޅ. އަތޮޅުގެ 15 އޮޑިއަކުން ގަނެފައިވާ 58.1 މެޓްރިކް ޓަނުގެ މަސް ހިމެނޭއިރު ދ. އަތޮޅުގެ ހަތަރު މަސް ދޯންޏަކުން 43.4 މެޓްރިކް ޓަނުގެ މަސް އިއްޔެ މިފްކޯއަށް ގަނެފައިވެ އެވެ.

މި ލިސްޓުގައި ފުވައްމުލަކުގެ 14 އޮޑިއަކުން ގަނެފައިވާ 26.8 މެޓްރިކްޓަނުގެ މަހާއި އައްޑޫގެ ހަތަރު އޮޑިއަކުން ގަނެފައިވާ 9.4 މެޓްރިކްޓަނުގެ މަސް ވެސް ހިމެނެ އެވެ.