ރާއްޖޭގެ ބޮޑު ބަޔަކަށް މިހާރު ކުރަމުންދާ ވިއްސާރައިގައި މާލެއަށް ރެކޯޑް އަދަދަކަށް ވާރޭވެހި މާލޭގެ ބޮޑު ސަރަހައްދެއްގައި ފެން ބޮޑުވެއްޖެ އެވެ.
މޫސުމާ ބެހޭ ގައުމީ އިދާރާ -- މެޓް އޮފީހުގެ އޮފިޝަލަކު މިރޭ ވިދާޅުވީ މިއަދު ހަވީރު 5:00 އިން 6:00 އަށް މާލެއަށް 60 މިލިމީޓަރުގެ ވާރޭވެހުނުއިރު ފާއިތުވި 24 ގަޑިއިރު މާލެއަށް 160 މިލިމީޓަރުގެ ވާރޭވެހުނު ކަމަށެވެ.
ހުޅުލެއަށް ފާއިތުވި 24 ގަޑިއިރު ތެރޭގައި 163 މިލިމީޓަރުގެ ވާރޭ ވެހުނު ކަަމަށްވެސް އޮފިޝަލް ވިދާޅުވި އެވެ.
މާލޭގައި ފެންބޮޑުވެ ވަރަށް ގިނަ ގެތަކަށް އަދި ފިހާރަތަކަށް ވަނީ ފެން ވަދެ ގެއްލުންތަކެއް ލިބިފަ އެވެ.
ސިފައިންނާއި ފުލުހުން ގުޅިގެން ދަނީ މާލޭގައި ފެންބޮޑުވެފައިވާ ފެންގަނޑު ހިންދުމުގެ މަސައްކަތް ދަނީ ކުރަމުންނެވެ.
މެޓް އޮފީހުން ވަނީ ކުރިއަށް އޮތް 24 ގަޑިއިރުވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެތީވެ މޫސުމަށް ސަމާލުވުމަށް އިލްތިމާސްކޮށްފަ އެވެ.
ކުރިއަށް އޮތް އާދިއްތަ ދުވަހުން ފެށިގެން މޫސުން އަލިވާނެ ކަމަށްވެސް މެޓް އޮފީހުން ލަފާކުރެ އެވެ.