ބޮޑު މޮޅަކާއެކު ބާސެލޯނާ ގަދަ 16 އަށް ރޭ ދަތުރުކޮށްފި އެވެ.
އާ އަހަރަށް ލީގު މެދުކަނޑާލިއިރު ނަތީޖާ ދަށްވެފައި އޮތް ނަމަވެސް ބާސެލޯނާގެ ކޯޗު ހަންސީ ފްލިކް މި މެޗަށް ވަރުގަދަ އެގާރައެއް ނެރެން ނިންމި އެވެ.
މެޗުގެ ފުރަތަމަ ގޯލު 21 ވަނަ މިނިޓުގައި ޖެހީ އެރިކް ގާސިއާ އެވެ. އޭގެ 11 މިނިޓް ފަހުން ލެވަންޑޯސްކީ ޖެހި ގޯލާއެކު، ބާސެލޯނާ އިން ފުރަތަމަ ހާފު ނިންމާލީ ދެ ގޯލުގެ ތަފާތުން ލީޑުގައި އޮވެގެންނެވެ.
ދެވަނަ ހާފު ފަށުމާއެކު، ލެވަންޑޯސްކީ އޭނާގެ ދެވަނަ ގޯލު ޖަހައިދިނެވެ. އަދި 56 ވަނަ މިނިޓުގައި ބާބަސްޓްރޯގެ ގޯލްކީޕަރު އާނޯ ފަބްރޭގާގެ ގޯހަކުން ބާސެލޯނާގެ ޒުވާން ކުޅުންތެރިޔާ ޕަބްލޯ ޓޯރޭ މެޗުގެ ހަތަރުވަނަ ގޯލު ޖެހި އެވެ.
އެއްތިރީސް ފަހަރު ކޮޕަ ޑެލް ރޭ ކާމިޔާބުކޮށްފައިވާ ބާސެލޯނާ އިން އެންމެ ފަހުން މި މުބާރާތް ކާމިޔާބުކުރީ 2021 ވަނަ އަހަރު އެވެ. އަދި މިހާރުވެސް ބާސާ އަކީ މި މުބާރާތް އެންމެ ގިނަ ފަހަރު ކާމިޔާބުކޮށްފައިވާ ޓީމެވެ.