ސިންގަޕޯ އެއާލައިންސްއަށް ރެކޯޑު އަދަދަކަށް ފައިދާވުމާ ގުޅިގެން މުވައްޒަފުންނަށް 8 މަހުގެ މުސާރައިގެ ބޯނަހެއް ދޭން ނިންމައިފި އެވެ.
ވައިގެ ދަތުރުފަތުރަށް ހުރި ޑިމާންޑާއި، ހާއްސަކޮށް އުތުރު އޭޝިއާގެ ޗައިނާ، ހޮންކޮން، ޖަޕާން އަދި ތައިވާން ފަދަ ގައުމުތަކުގެ ބޯޑަރުތައް ފުރިހަމައަށް ހުޅުވުމާ ގުޅިގެން 2023-2024 ގެ މާލީ އަހަރުގައި ސިންގަޕޯ އެއާލައިންސްއަށް 1.98 ބިލިއަން ޑޮލަރުގެ ފައިދާއެއް ވަނީ ލިބިފަ އެވެ. ނަމަވެސް ސިންގަޕޯ އެއާލައިންސްގެ ފައިދާގެ ބަޔާނުގައި ފާހަގަކޮށްފައިވާ ގޮތުގައި، ކުރިއަށް އޮތް އަހަރަކީ މި ދާއިރާއަށް ދަތި އަހަރަކަށް ވެދާނެ އެވެ.
ސްކައިޓްރެކްސް ވޯލްޑް އެއާލައިން އެވޯޑްސްގެ ފަރާތުން ދުނިޔޭގެ އެންމެ ރަނގަޅު އެއާލައިންގެ އެވޯޑް މިދިޔަ އަހަރު ސިންގަޕޯ އެއާލައިންސްއަށް ދީފައިވެ އެވެ. މި އިނާމުގެ 23 އަހަރުގެ ތާރީހުގައި ސިންގަޕޯ އެއާލައިންސް އިން މި މަގާމު ހޯދީ މިއީ ފަސްވަނަ ފަހަރެވެ.
ސިންގަޕޯ އެއާލައިންސްގެ ސީއީއޯ ގޯ ޗޫން ފޮންގް ވިދާޅުވި ގޮތުގައި މި ކާމިޔާބީ ހާސިލްކުރެވުނީ އެސްއައިއޭ އަލުން ކުރިއަރައި ދިއުމަށް އޭނާގެ ޓީމުން ކުރި ބުރަ މަސައްކަތާއި ގިނަ ގުރުބާނީތަކުގެ ސަބަބުންނެވެ.
"އެކަމުގެ ސަބަބުން ބަލިމަޑުކަމުން އަޅުގަނޑުމެންނަށް ވަނީ އިތުރަށް ވަރުގަދަވެ، ކުރިއަރައި ދެވިފައި"
މުވައްޒަފުންނަށް މިފަދަ ބޮޑު ބޯނަހެއް ދޭން ނިންމި ހަމައެކަނި އެއާލައިނަކީ މިއެއް ނޫނެވެ.
ރޮއިޓާޒްއިން މި ހަފްތާގައި ރިޕޯޓުކުރި ގޮތުގައި ދުބާއީގެ އެމިރޭޓްސްއިން އެ ކުންފުނީގެ މުވައްޒަފުންނަށް 20 ހަފްތާގެ މުސާރައާ އެއްވަރުގެ ބޯނަހެއް ދޭން ވަނީ ނިންމާފަ އެވެ.