އެޕަލްގެ ސީއީއޯ، ޓިމް ކުކްގެ އަމިއްލަ ޖީބުން އެމެރިކާގެ އިންތިޚާބީ ރައީސް ހުވައިކުރައްވާ ރަސްމިއްޔާތަށް ހޭދަކުރެއްވުމަށް އެއް މިލިއަން ޑޮަލަރު ދެއްވާނެ ކަމަށް ވިދާޅުވެއްޖެ އެވެ.
ޓިމް ކުކް ވިދާޅުވި ގޮތުގައި ރައީސުން ހުވައިކުރައްވާ ރަސްމިއްޔާތަކީ އެމެރިކާގެ ސަގާފަތާ ގުޅިގައި އޮތް ކަމެކެވެ. މިހެން ކަން އޮތުމުން، އެ ރަސްމިއްޔާތު ކުލަގަދަކޮށް ބޭއްވުމަށް އަދި އެއްވެސް ތާށިކަމެއް ނެތި ކުރިއަށް ގެންދިއުމަށް އަމިލް ޖީބުން ނަމަވެސް އެއްޗެއް ދެއްވުމަކީ އުފަލެކެވެ.
ރިޕޯޓްތައް ބުނާ ގޮތުން ޓިމް ކުކްގެ އެދިވަޑައިގަތުމަށް ޑޮނަލްޑް ޓްރަމްޕްގެ ފްލޮރިޑާ ގަނޑުވަރު މާރަލާގޯގައި ދެވެރިން ވަނީ ބައްދަލުކުރައްވާފަ އެވެ.
މި ބައްދަލުކުރެއްވުމުގައި ޓިމް ކުކް ދެއްކެވި ވާހަކަތަކުގައި ދުނިޔޭގެ ބާޒާރުގައި އެޕަލްގެ ހައިސިއްޔަތު ޓްރަމްޕަށް އޮޅުންފިލުވައި ދެއްވި އެވެ. އަދި ޔޫރަޕްގެ ގައުމުތަކުން ކުރީ ޖޫރިމަނާގެ ސަބަބުން އެޕަލްއަށް ލޮޅުންއަރާ ކަމަށް ވިދާޅުވި އެވެ.
ޔޫރަޕިއަން ޔޫނިއަނުން އެޕަލްއާ ދެކޮޅަށް ކުރި ދައުވާއެއްގައި، އަޔަލަންޑްއަށް 14.34 ބިލިއަން ޑޮލަރު ދައްކަން ޖެހޭ ގޮތަށް ވަނީ ހުކުމްކޮށްފަ އެވެ. އެއީ ބުނެވޭ ގޮތުގައި އެޕަލުން ޓެކުހަށް މަކަރުހެދުމުގެ ސަބަބުން ލިބުނު ލަނޑެކެވެ.
އެމެރިކާގެ ރައީސްގެ މަގާމަށް ޖެނުއަރީ 20 ގައި ޓްރަމްޕް ވަޑައިގެން ސިޔާސަތު ބައްޓަންކުރައްވާނެ ގޮތެއް އެކަކަށްވެސް އަދި ނޭނގެ އެވެ. ޓެކް ކުންފުނިތަކުން ވެސް ބިރުން އުޅޭ ސަބަބަކީ މިއީ އެވެ.
ފޭސްބުކް، އިންސްޓާގްރާމް އަދި ވަޓްސްއެޕްގެ ބެލެނިވެރި ކުންފުނި، މެޓާއިން ވެސް ވަނީ ޓްރަމްޕަށް އެއް މިލިއަން ޑޮލަރު ހަދިޔާކޮށްފަ އެވެ. އެއް މިލިއަން ޑޮލަރު ހަދިޔާކުރުމަށް މާރަލާގޯގައި ޓްރަމްޕާ ބައްދަލުކުރެއްވީ މެޓާގެ ވެރިޔާ މާކް ޒުކަބާގް އެވެ.
މި ބައްދަލުކުރެއްވުމުގައި މާކް ޒުކަބާގް ވަނީ ޓްރަމްޕް ސަރުކާރެގައި، އެމެރިކާގެ ޓެކްނޮލޮޖީ ސިޔާސަތު ހަރުދަނާކުރުމަށް އެހީތެރިވެދެއްވާނެ ކަމަށް ވިދާޅުވެފަ އެވެ.