އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕް ހުވައިކުރައްވާ ރަސްމިއްޔާތަށް ޚަރަދުކުރުމަށް މާކް ޒަކަބާތް އެއް މިލިއަން ޑޮލަރު ދެއްވައިފި އެވެ.
އެމެރިކާގެ އޮންލައިން ނޫސް ވޯލް ސްޓްރީޓް ޖާނަލުން ބުނާ ގޮތުން މިއީ ޓްރަމްޕްގެ ރުހުން ހޯއްދެވުމަށް، ފޭސްބުކާއި ވަޓްސްއެޕް އަދި އިންސްޓާގްރާމްގެ ވެރިޔާ ނުފެންނަ ރޮދިން ޖެއްސެވި މަޅި އެކެވެ.
މި އަހަރުގެ ނޮވެމްބަރު ފަހެއްގައި އެމެރިކާގައި އޮތް ރިޔާސީ އިންތިޚާބު ޑޮނަލްޑް ޓްރަމްޕް ކާމިޔާބުކުރެއްވުމާ ގުޅިގެން މާކް ޒަކަބާގް ވަނީ އަމިއްލައަށް އިސްނަންގަވައި، އިންތިޚާބީ ރައީސްއާ ބައްދަލުކުރައްވާފަ އެެެވެ. ބައްދަލުވުން އޮތީ ފްލޮރިޑާގައި ހުން ޓްރަމްޕްގެ ގަނޑުވަރު، މާރަލާގޯގަ އެވެ.
މި ބައްދަލުވުމުގައި ދެއްދެވި ވާހަކަތަކުގެ ތެރޭގައި، ޓްރަމްޕް ސަރުކާރުގެ ޓެކްނޮލޮޖީ ސިޔާސަތަށް ތާއީދުކުރައްވާނެ ކަމަށް ޒަކަބާގް ވިދާޅުވި އެވެ. އަދި އެމެރިކާގެ ޓެކްނޮލޮޖީ ސިޔާސަތު ހަރުދަނާކުރުމަށް އަމަލީ ގޮތުން ބައިވެރިވެވަޑައިގަންނަވާނެ ކަމަށްވެސް ވިދާޅުވި އެވެ.
އެމެރިކާގެ ރައީސްގެ މަގާމުގައި ޑޮނަލްޑް ޓްރަމްޕް ވަނީ މީގެކުރިން ހަތަރު އަހަރުގެ އެއްޓާމް -- ޖެނުއަރީ 20، 2017 - ޖެނުއަރީ 20، 2021 އަށް އަދާކުރައްވާފަ އެވެ. ދެވަނަ ދައުރަކަށް ވާދަކުރެއްވި ނަަމަވެސް، އިންތިޚާބު ކާމިޔާބުކުރެއްވީ، ޑިމޮކްރެޓިކް ކެންޑިޑޭޓް އަދި މިހާރުގެ ރައީސް ޖޯ ބައިޑަން އެވެ.
ޖޯ ބައިޑަން ހޯއްދެވި ކާމިޔާބާ މެދު ނުތަނަވަސްވެ ވަޑައިގެން ޓްރަމްޕް ވަނީ ވޯޓު އޮޅުވާލާފައިވާ ކަމަށް ވިދާޅުވެފަ އެވެ. އަދި އޭނާއަށް ތާއީދުކުރާ މީހުން މަގުތަކަށް ނުކުތުމަށް ގޮވާލެއްވި އެވެ.
ސޯޝަލް މީޑިއާ މެދުވެރިކޮށް ހިންގެވި މި ހަމަނުޖެހުންތަކުގައި، އެމެރިކާގެ ގާނޫންހަދާ މަޖިލީހަށް ވެސް ޓްރަމްޕްގެ ސަޕޯޓަރުން ވަދެތަގެވެ.
މި ހާދިސާއާ ގުޅިގެން ފޭސްބުކާއި އިންސްޓާގްރާމް އަދި ވަޓްސްއެޕުން ޑޮނަލްޑް ޓްރަމްޕާ ދެކޮޅަށް ފިޔަވަޅުއެއްޅުއްވި އެވެ. އަދި ޓްރަމްޕް ބޭނުންކުރައްވާ އެކަންއުންޓްތައް ބަންދުކުރި އެވެ.
މާކް ޒަކަބާގް މިހާރު އެ ކުރައްވާ މަސައްކަތަކީ، ޓްރަމްޕާ އޭނާއާ ދެމެދު ގޯސްވެފައި އޮތް ގުޅުން ރަނގަޅުކުރުމަށް ކުރައްވާ މަސައްކަތްތަކެވެ.