އެމެރިކާގައި 2020 ވަނަ އަހަރު އޮތް ރިޔާސީ އިންތިޚާބުގައި އޭރުގެ ރައީސް ޑޮނަލްޑް ޓްރަމްޕްއާ ދެކޮޅަށް މާކް ޒުކަބާގްގެ ސޯޝަލް މީޑިއާ ނެޓްވޯކްތަކުން -- ފޭސްބުކާއި ވަޓްސްއެޕް އަދި އިންސްޓާގްރާމުން މައުލޫމާތު ފެތުރި ކަމަށް ޓްރަމްޕް ތުހުމަތުކުރައްވައިފި އެވެ.
ޓްރަމްޕް އަދި ވިދާޅުވީ މި އަހަރު ނޮމެވްބަރުގައި އޮންނަ އިންތިޚާބަށް ނުފުޒުފޯރުވުމަށް މާކް ޒުކަބާގްގެ އެއްވެސް ވަސީލަތުން މަސައްކަތްކޮށްފިކަން ސާބިތުވެއްޖެ ނަމަ -- ދިގު މުއްދަތަކަށް ޒުކަބާގް ޖަލަށް ލާނެ ކަމަށެވެ.
އޭނާ ވެެރިކަމުން ދުރުކުރުމަށް ޒުކަބާގް ކެހިވެރި ރޭވުންތަކެއް ރޭއްވެވި ކަމަށް ވެސް ޓްރަމްޕް ތުހުމަތުކުރެއްވި އެވެ. ޓްރަމްޕް ވިދާޅުވި ގޮތުައި ޒުކަބާގަކީ ދެފުށްކެހެރިކަން ބޮޑު ބޭފުޅެކެވެ.
މާކް ޒުކަބާގާ ބެހޭ ގޮތުން އޭނާގެ ޓީމުން ވަރަށް ގިނަ މައުލޫމާތު މިހާރުވެސް އެއްކޮށްފި ކަމަށް ޓްރަމްޕް ވިދާޅުވި އެވެ. އަދި އިތުރު ގޯހެއް ނުހެއްދެވުމަށް ޒުކަބާގަށް ދަންނަވާ ކަމަށް ވެސް ޓްރަމްޕް ވިދާޅުވި އެވެ.
ވައިޓް ހައުސްއަށް ވަޑައިގެން އޭނާއަށް ތައުރީފްކުރައްވައި ޒުކަބާގް ވަރަށް ގިނައިން ވާހަކަދައްކަވާ ކަމަށް ވެސް ޓްރަމްޕް ވިދާޅުވި އެވެ. ޓްރަމްޕް ކަލަހަ ސިޔާސީ ލީޑަރަކު ފޭސްބުކްގައި ނެތް ކަމަށް ޒުކަބާގް ވިދާޅުވި ކަމަށް ވެސް ޓްރަމްޕް ވިދާޅުވި އެވެ.
ނަމަވެސް، އެހެން ފަހުވަގުތު، އޭނާއާ ދެކޮޅަށް ސޯޝަލް ނެޓްވޯކްތައް އެނބުރިގަތް ވަގުތު ޒުކަމާބްގެ ފަރާތުން އެެއްވެސް ވަރަކަށް އެހިތެރިކަން ލިބިވަޑައި ނުގަތް ކަމަށް ވެސް ޓްރަމްޕް ވިދާޅުވި އެވެ.
ފޭސްބުކާއި، އިންސްޓާގްރާމް އަދި ވަޓްސްއެޕްގައި ޓްރަމްޕް ބޭނުންކުރައްވާ އެކައުންތައް ބަންދުކޮށް -- މި ނެޓްވޯކްތަކުގެ ބެލެނިވެރި ކުންފުނި، މެޓާއިން އޭނާއާ ދެކޮޅަށް ޒާތެއްގެ ބަޣާވާތެއް ކުރި ކަމަށް ވެސް ޓްރަމްޕް ތުހުމަތުކުރެއްވި އެވެ.
މި އަހަރު ނޮވެމްބަރު ފަހެއްގައި އޮންނަ ރިޔާސީ އިންތިޚާބަށް ކުޑަތަން ވަމުން އަންނައިރު، ޓްރަމްޕްގެ ސަޕޯޓަރުން މާކް ޒުކަބާގަށް ވަރަށް ރަނގަޅަށް ބަލާނެ ކަމަށް ވެސް ޓްރަމްޕް ވިދާޅުވި އެވެ.
ޑޮނަލްޑް ޓްރަމްޕަށް އޮތް ތާއީދަށް މެޓާ ނެޓްވޯކުން ހުރަސްއަޅައި ދޮގު މައުލޫމާތު ފަތުރާ ނަމަ -- އޭނާއަށް ރައީސްކަން ލިބިވަޑައިގަންނަވާ ދުވަހު، ޒުކަބާގު ހައްޔަރުކުރައްވާނެ ކަމަށް ވެސް ޓްރަމްޕް ވިދާޅުވި އެވެ.