އެމެރިކާގެ ރައީސް ދެއްވާ "ޕްރެޒިޑެންޝަލް މެޑަލް އޮފް ފްރީޑަމް" ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާ ލިއޮނެލް މެސީއަށް ދިނުމަށް ނިންމައިފި އެވެ. މި މެޑަލް ލިބޭ ފުރަތަމަ ފުޓްބޯޅަ ކުޅުންތެރިޔާއަކީ ވެސް މެސީ އެވެ.
މި މެޑަލް މެސީއަށް ދިނުމަށް ނިންމީ އޭނާ ކުޅިވަރުގެ ދާއިރާއިން ކޮށްފައިވާ މަސައްކަތްތަކާއި، އިޖުތިމާއީ ޚިދުމަތުގައި އަދާކުރަމުންދާ މުހިއްމު ދައުރަށް ބެލުމަށްފަހު އެވެ.
މެސީގެ ފައުންޑޭޝަން މެދުވެރިކޮށް އޭނާ ވަނީ އެކި ގައުމުތަކުގެ ކުޑަކުދިންނަށް އެހީތެރިވެދީ، ސިއްހީ އަދި ތައުލީމީ ދާއިރާއިން ގިނަގުނަ ހިދުމަތްތަކެއް ފޯރުކޮށްދީފަ އެވެ.
ވައިޓް ހައުސްގެ ބަޔާނެއްގައި ބުނެފައިވާ ގޮތުގައި މެސީ ވަނީ އޭނާގެ އުފަން ގައުމު އާޖެންޓީނާގައި އައު ހޮސްޕިޓަލެއް ގާއިމުކޮށް، ބަންގްލަދޭޝް އަދި ސީރިއާގެ ކުޑަކުދިންނަށް އެހީތެރިވެ ދީފަ އެވެ. މިހާރު އިންޓަ މަޔާމީގައި ކުޅެމުންދާ މެސީއަކީ ވޯލްޑް ކަޕް ކާމިޔާބުކޮށްފައިވާ ކުޅުންތެރިއެކެވެ.
މިއީ އެމެރިކާގެ ރައީސް އެކި ދާއިރާތަކުން ހިދުމަތްކުރާ ފަރާތްތަކަށް ދެއްވާ އެންމެ މަތީ ޝަރަފުގެ މެޑެލެވެ. މިއަހަރު 19 ފަރާތަކަށް މި މެޑަލް ދިނުމަށް ނިންމާފައިވެ އެވެ.