ޔޫއޭއީގެ ދަމަކް ގުރޫޕުން އެމެރިކާގައި 20 ބިލިއަން ޑޮލަރު އިންވެސްޓްކުރަން ތައްޔާރަށް އޮތް ކަމަށް އިންތީޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް ވިދާޅުވި ގޮތުން އިންވެސްޓްމަންޓްގެ ފުރަތަމަ ބުރު އަމާޒުކުރާ ސްޓޭޓްތަކުތެ ތެރޭގައި ޓެކްސަސް، އޮކްލޮހާމާ، ލުއިޒިއާނާ، އޯހަޔޯ އަދި އިންޑިއާނާ ހިމެނެ އެވެ.
ދަމަކް އަކީ ވަރަށް ފުޅާ ދާއިރާއެއްގައި ގެދޮރުގެ ވިޔަފާރި ކުރާ ގުރޫޕެކެވެ. ދަމަކް މުޅި ދުނިޔެއަށް މަޝްހޫރުވެފައި ވަނީ ލަގްޒަރީ ރިއަލް އެސްޓޭޓް ވިޔަފާރީގެ ލީޑަރެއްގެ ގޮތުގަ އެވެ.
ދަމަކްގެ ވިޔަފާރި މިހާރު ފުޅާވެފައި އޮތް މިންވަރަށް ބަލާއިރު، ޓޫރިޒަމް ސިނާއަތަށް ވެސް ވަނީ ވަދެފަ އެވެ. އަދި މީގެ އިތުރުން ލައިފްސްޓައިލް، އޮނޮވޭޝަން އަދި ޓެކްނޮލޮޖީ ސިނާއަތުގައި ވެސް މި ގުރޫޕުން ވަނީ އިންވެސްޓްކޮށްފަ އެވެ. ދަމަކް އެއާގެ ނަމުގައި ލަގްޒަރީ އެއާލައިނެއް ވެސް މި ގުރޫޕުން މިހާރު ވަނީ އުފައްދާފަ އެވެ. މި އެއާލައިން ދަތުރުކުރާ މަންޒިލްތަކުގެ ތެރޭގައި ދިވެރާއްޖެ ވެސް ހިމެނެ އެވެ.
ދަމަކް ގުރޫޕުން ދިވެހިރާއްޖޭގައި، ޓޫރިޒަމް ދާއިރާގައި ވެސް ވަނީ އިންވެސްޓްކޮށްފަ އެވެ.
އެމެރިކާގައި އިންވެސްޓްކުރުމާ ބެހޭ ގޮތުން، ފްލޮރިޑާގައި ހުންނަ ޓްރަމްޕްގެ ގަނޑުވަރު މާރަލާގޯގައި ވާހަކަދައްކަވަމުން ދަމަކުގެ ބާނީ، ހުސައިން ސަޖްވާނީ ވަނީ އެމެރިކާގައި އަދިވެސް އިންވެސްޓް ކުރައްވާނެ ކަމަށް ވިދާޅުވެފަ އެވެ.
ދަމަކުން އެމެރިކާގައި އިންވެސްޓްކުރަނީ ޓެކްނޮލޮޖީ ސިނާއަތުގަ އެވެ. އެއީ ޑާޓާ ސެންޓަރުތައް އަޅައި އާޓިފިޝަލް އިންޓެލިޖެންސް ތަރައްގީކުރަން ކަމަށްވެސް ޓްރަމްޕް ވިދާޅުވި އެވެ.
ދަމަކްގެ ވެރިޔާ ހުސައިން ސަޖްވާނީ އަކީ ޓްރަމްޕްގެ ވަރަށް އަރިސް ބޭފުޅެކެވެ. މި ގުރޫޕުން މީގެ ކުރިން ވެސް ވަނީ ޓްރަމްޕާ ގުޅުހުން ދާއިރާތަކުގައި އިންވެސްޓްކޮށްފަ އެވެ. މި ގޮތުން ޓްރަމްގެ ނަމުން މަޝްހޫރު ހޮޓެއިލް ޗެއިންތަކުގައި ވެސް ދަމަކްގެ އިންވެސްޓްމަންޓްތައް ހިމެނެ އެވެ.