އަމިއްލަ ގުރޫޕެއް ކަމަށްވާ "އަލްހިޖުރަ" ގުރޫޕާ އެކު އުމްރާއަށް ދިޔަ ބަޔަކު މައްކާގައި ހާލުގައި ޖެހިފައިވާތީ އެ މައްސަލަ ބަލައި އިހްމާލުވި ގުރޫޕްގެ ވެރިންނަށް ފިޔަވަޅު އަޅާނެ ކަމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މައްކާގައި ހާލުގައި ޖެހިފައި ތިބީ 24 މީހަކު ކަމަށް މައުލޫމާތު ލިބެ އެވެ.
އަލްހިޖްރަ ކުންފުނީގެ ފޭސްބުކް ޕޭޖުގައި ކޮށްފައިވާ ޕޯސްޓެއްގައި ބުނީ އުމްރާވެރިންގެ އަޅުކަން ނިމިފައިވާ ކަމަށެވެ. އެކަމަކު ކުންފުންޏަށް ދިމާވެފައިވާ މާލީ ދަތިތަކަކާ ހުރެ އުމްރާވެރިން ރާއްޖެ ގެންނަން ދަތިވެފައިވާ ކަމަށެވެ.
"މި ކުންފުނިން މިވަގުތުވެސް ދަނީ އުމްރާވެރިން ރާއްޖެ ގެނައުމަށްޓަކައި މަސައްކަތް ކުރަމުން. ނަމަވެސް އަދި މިއަދާ ހަމައަށް ވަނީ މިކަމުގައި ކުރިމަގެއް ނުފެނިފައި،" ޕޯސްޓްގައި ބުނެފައިވެ އެވެ.
މިމައްސަލައިގައި މިނިސްޓަރު ޝަހީމް ވިދާޅުވީ އަލްހިޖްރަ ކިޔާ ކުންފުންޏެއްގެ ހަވާލުގައި އުމްރާއަށް ދިޔަ ބަޔަކަށް ދިމާވެފައިވާ ހާލަތު މިނިސްޓްރީގެ ސަމާލުކަމަށް އައިސްފައިވާތީ އެ މީހުން އެނބުރި ގައުމަށް ގެނައުމަށް ކޮށްދެވެން އޮތް ކަމެއް މިނިސްޓްރީން ކުރާނެ ކަމަށެވެ. އެގޮތުން މައްކާގައި މިވަގުތު ތިބި މޯލްޑިވްސް ހައްޖު ކޯޕަރޭޝަންގެ ޓީމު މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވަމުންދާ ކަމަށްވެސް ވިދާޅުވި އެވެ. އަދި އެކަމުގައި އަމަލުކުރަންވީ ގޮތުގެ އިރުޝާދު ހައްޖު ކޯޕަރޭޝަންގެ މެނޭޖިން ޑިރެކްޓަރަށް ދީފައިވާނެ ކަމަށްވެސް ވިދާޅުވި އެވެ.
"ދިވެހި އެއްވެސް ރައްޔިތަކަށް ދިމާވާ ދަތިކަމެއްގައި އެހީ ނުވެ އަޅުގަނޑުމެން ނުތިބޭނަން. ރައީސް މުއިއްޒު އަބަދުވެސް އިރުޝާދު ދެއްވަނީ ރައްޔިތުންނާ ގާތުން މަސައްކަތްކުރުމަށް. ދިމާވާ ކަންކަން ހައްލުކުރުމަށް،" ޝަހީމް ވިދާޅުވި އެވެ.
އަލްހިޖުރާ ގުރޫޕްގެ ހަވާލުގައި އުމްރާއަށް ދިޔަ ކޮންމެ މީހެއްގެ އަތުން އެ ޖަމާއަތުން ވަނީ 28،500 ރުފިޔާ ނަގާފަ އެވެ. އަދި ކުރިއަށް އޮތް ރަމަޟާން މަހުވެސް މީހުން އުމްރާއަށް ގެންދިއުމަށް މިހާރުވެސް ދަނީ އިޝްތިހާރު ކުރަމުންނެވެ.