ބަދަލު ހިފުމުގެ ރޫހުގައި އެއްވެސް ކަމެއް ނުކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ގދ. މާމެންދޫގެ ރައްޔިތުންނާ ބައްދަލުކުރައްވާ ރައީސް މުއިއްޒު ރޭ ވިދާޅުވީ ފާއިތުވި 14 ވަރަކަށް މަސްދުވަހު ރާއްޖޭގައި ހަމަޖެހުން ގާއިމުކުރެވިފައިވާ ކަމަށާއި ބަދަލުހިފުމުގެ ރޫހުގައި އެއްވެސް ކަމެއް ހިނގާފައި ނުވާ ކަމަށެވެ.
ސިޔާސީ ވާދަވެރިކަމުގެ ތެރެއިން ބަޔަކަށް އަނިޔާކޮށް، ސިޔާސީ ވިސްނުމުގެ ތެރެއިން ބަޔަކު ހައްޔަރުކުރުމަކީ ގަބޫލުކުރައްވާ ކަމެއް ނޫން ކަމަށް ރައީސް މުއިއްޒު ވިދާޅުވި އެވެ.
ކުރިއަށް އޮތް ތަނުގައިވެސް ބަޔަކަށް ސިޔާސީ އަނިޔާއެއް ނުދެއްވާނެ ކަމަށާއި ބަދަލު ހިފުމެއް ނޯންނާނެ ރައީސް ވިދާޅުވި އެވެ.
"ސިޔާސީ ވިސްނުމުގެ ތެރެއިން ގެންގޮސް ހައްޔަރުކޮށް، ޖަލަށް ލައި، އުނދަގޫކޮށް ހެދުމަކީ އަޅުގަނޑު ގަބޫލުކުރާ ކަމެއް ނޫން،" ރައީސް މުއިއްޒު ވިދާޅުވި އެވެ.
ރައީސް މުއިއްޒު ވިދާޅުވި ގޮތުގައި ތަރައްގީގެ ފުރިހަމަ ނަފާ ރައްޔިތުންނަށް ލިބޭނީ ގައުމުގައި ހަމަޖެހުން އޮވެގެންނެވެ. ރައީސް ވަނީ ގައުމުގައި ހަމަޖެހުން ގާއިމުކޮށް ގައުމު ކުރިއަށް ގެންދިއުމުގައި ހުރިހާ ރައްޔިތުންވެސް އެއްބާރުލުން ދެއްވުމަށް އެދިވަޑައިގެންފަ އެވެ.
ސިޔާސީ ފަރާތަކުން ކަމުގައިވިޔަސް ނުވަތަ އެހެން ފަރާތަކުންވެސް މި ހަމަޖެހުން ނަގާލުމުގެ ފުރުސަތު ނުދެއްވާނެ ކަމަށް ރައީސް ވިދާޅުވި އެވެ.