އެމެރިކާގެ ކެލިފޯނިއާގައި ރޯވެފައިވާ އަލިފާންގަނޑުގެ ސަބަބުން ގެޓީ ވިލާ މިއުޒިއަމަށް ގެއްލުން ލިބި، 1000 އަށް ވުރެ ގިނަ އިމާރާތް ހަލާކުވެއްޖެ އެވެ.
އެމެރިކާގެ ކެލިފޯނިއާ ސްޓޭޓްގެ ދެކުނު ސަރަހައްދުގައި ހިނގާފައިވާ މިހާދިސާގައި ދެ މީހަކު މިހާތަނަށް ވަނީ މަރުވެފަ އެވެ.
އަލިފާނުގެ ހާދިސާ އިތުރަށް ގޯސްވާތީ ކެލިފޯނިއާގައި ވަނީ ކުއްލި ނުރައްކަލުގެ ހާލަތުވެސް އިއުލާން ކޮށްފަ އެވެ.
ކެލިފޯނިއާ ޑިޕާޓްމަންޓް އޮފް ފޮރެސްޓްރީ އެންޑް ފަޔަ ޕްރޮޓެކްޝަން (ކެލް ފަޔަ) އިން މައުލޫމާތު ދީފައިވާ ގޮތުގައި އަލިފާން ފުރަތަމަ ރޯވީ ލޮސް އެންޖެލިސްގެ ޕެސިފިކް ޕެލިސެޑެސް ސަރަހައްދުގައެވެ. އަދި މިހާރު ވަނީ އިތުރު ދެ ސަރަހައްދަކަށް އަލިފާން ފެތުރިފަ އެވެ.
މި ހާދިސާގައި މިހާތަނަށް ޖުމްލަ 2،285 ހެކްޓަރު (5،648 އޭކަރު)ގެ ސަރަހައްދެއް ވަނީ އަނދައި ހުލިވެފަ އެވެ. އަދި ޕެސިފިކް ޕެލިސޭޑްސްގައި އެކަނި ގާތްގަނޑަކަށް 1،000 އިމާރާތް ވަނީ ހަލާކުވެފަ އެވެ. އަލިފާން މިހާރު ވަނީ މާލިބޫ ސަރަހައްދާ ހަމައަށް ފެތުރިފަ އެވެ.
ދުނިޔޭގެ އެންމެ މުއްސަނދި އާޓް މިއުޒިއަމްތަކުގެ ތެރޭގައި ހިމެނޭ ގެޓީ ވިލާ މިއުޒިއަމްގެ ދަނޑުގައި ހުރި ބައެއް ގަސްގަހާގެއްސަށް ވެސް މި ހާދިސާގެ ސަބަބުން ގެއްލުން ވެފައިވެ އެވެ.
އަލިފާނުގެ ނުރައްކާ އޮތް ސަރަހައްދުތަކުން އެތައް ހާސް ރައްޔިތުން ސަލާމަތްކުރުމުގެ މަސައްކަތް ދަނީ ކުރަމުންނެވެ. އަދި ރައްކާތެރިކަމުގެ ގޮތުން ސްކޫލްތައްވެސް ވަނީ ބަންދުކޮށްފަ އެވެ. މީގެ އިތުރުން ހޮލީވުޑްގައި ބޭއްވުމަށް ހަމަޖެހިފައިވާ ބައެއް އިވެންޓްތައްވެސް މި ހާދިސާއާއި ގުޅިގެން މިހާރު ވަނީ ކެންސަލްކޮށްފަ އެވެ.