ފުވައްމުލަކުގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމުގެ ތުހުމަތުގައި ދެ މީހުން ދޫކޮށްލަން ހައިކޯޓުން އަމުރުކޮށްފި އެވެ.
ފުލުހުން މިދިޔަ ޑިސެމްބަރު ނުވަވަނަ ދުވަހު ފުވައްމުލަކުގައި ކުރިއަށް ގެންދިޔަ ހާއްސަ އޮޕަރޭޝަން -- "އޮޕަރޭޝަން ވެށި ރައްކަލް"ގެ ތެރެއިން ހައްޔަރުކުރީ ފުވައްމުލައް، ދޫޑިގަން، ކަރަންކާވިލާ، އަހްމަދު ނިއުޝާދު (34 އަހަރު) އާއި، ޏ. ފުވައްމުލައް، ދޫޑިގަން، ޒަމާނީގެ، ހަސަން އާޒިމް (29 އަހަރު) އެވެ.
މި ދެ މީހުންގެ ބަންދާ މެދު ގޮތެއް ނިންމުމަށް އެންމެ ފުރަތަމަ ފުވައްމުލަކު މެޖިސްޓްރޭޓް ކޯޓަށް ހާޒިރުކުރުމުން ޝަރީއަތް ނިމެންދެން އެމީހުން ބަންދުކުރުމަށް އަމުރުކުރީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއަށް ރިއާޔަތްކޮށްފަ އެވެ. އެއީ ކުށުގެ ތުހުމަތުގައި ބަންދުކޮށްފައިވާ މީހަކު ބަންދުކޮށްފައިވަނީ ގަނޫނާ އެއްގޮތަށްތޯ ނުވަތަ ނޫންތޯ ކަނޑައަޅައި އެ މީހަކު އިތުރަށް ބަންދުގައި ބެހެއްޓުމާ މެދު ގޮތް ކަނޑައަޅާ މާއްދާ އެކެވެ. އަދި އެމީހުން ޝަރީއަތް ނިމެންދެން ބަންދުކުރަން އަމުރުކުރިއިރު ހެކި ހުރި މިންވަރު ބެލި ގޮތް ގޯސްކަމަށްވެސް ހައިކޯޓުގެ އަމުރުގައިވެ އެވެ. އެހެންވެ އެމީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށް ކަނޑައަޅައި އެ މީހުން ދޫކޮށްލުމަށް ހައިކޯޓުން އަމުުރުކުރީ އެވެ.
ނިއުޝާދު އާއި އާޒިމް އެކު އިތުރު ބަޔަކުވެސް ފުލުހުން ހައްޔަރުކުރި އެވެ. އެކަމަކު މި ދެ މީހުންގެ މައްޗަށް ފުލުހުން ކުރަނީ މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމުގެ ތުހުމަތެވެ.
ފުލުހުން ފުވައްމުލަކުގައި ކުރިއަށް ގެންދިޔަ އެ އޮޕަރޭޝަންގައި 4,048 ހޮޓްސްޕޮޓް ބަލައި ފާސްކޮށް، 1,147 މީހުން ހުއްޓުވައި ސުވާލުކޮށް ބަލައި ފާސްކޮށް، 58 މީހަކު ހައްޔަރުކުރި އެވެ.
ހައްޔަރުކުރި މީހުންގެ މައްޗަށް ތުހުމަތު ކުރެވޭ ޖުމުލަ 75 މައްސަލައެއް ތަހުގީގުކޮށް 65 މައްސަލައެއްގައި ދައުވާކުރަން ޕީޖީ އޮފީހަށް ފޮނުވި ކަމަށްވެސް ފުލުހުން ކުރިން ބުންޏެވެ.
ފުލުހުން ބުނީ ތަހުގީގަށް ހޯދިފައިވާ ގޮތުގައި ފާއިތުވި ފަސް އަހަރު ތެރޭގައި އަހްމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށެވެ. އަދި ފާއިތުވި ދެ އަހަރު ތެރޭގައި ހަސަން އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާކަން ފާހަގަކުރެވޭ ކަމަށްވެސް ފުލުހުން ބުންޏެވެ.
މި މައްސަލައާ ގުޅިގެން 21 މީހެއްގެ އަދި ދެ ކުންފުންޏެއްގެ އެކައުންޓް ކޯޓު އަމުރުގެ ދަށުން ވަނީ ހިފަހައްޓާފަ އެވެ. އަދި މި ފަރާތްތަކުގެ މައްޗަށް ތުހުމަތުކުރެވޭ މަނީ ލޯންޑަރިންގެ މައްސަލަ އިތުރަށް ތަހުގީގު ކުރަމުންދާ ކަމަށްވެސް ފުލުހުން އޭރު ބުންޏެވެ.