އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ކޯޓަށް ހާޒިރުކުރުން ތާވަލާ އެއްގޮތަށް ކުރިއަށް ގެންގޮސް މިއަދު ހުކުމް އިއްވައިފި އެވެ.
ޓްރަމްޕްގެ މައްޗަށް އުފުލާފައި އޮތް، ފައިސާ ދީގެން ހެކި ނައްތާލަން ކުރެއްވި މުއަމާލާތްތަކުގެ މައްސަލާގައި ނިއުޔޯކުގެ ފަނޑިޔާރު ޖުއާން މާޗަން ހުކުމްކުރެއްވީ ޓްރަމްޕް ކުށްވެރިވާ ކަމަށެވެ.
ނަމަވެސް، އެއްވެސް ޝަރުތެއް ނެތި ސްޕްރީމް ކޯޓުން ޓްރަމްޕް ވަނީ ދޫކޮށްލާފަ އެވެ.
ޑޮނަލްޑް ޓްރަމްޕް މިއަދު ކޯޓަށް ހާޒިރުވެވަޑައިގަތީ، ފަނޑިޔާރު ދެއްވާފައި އޮތް އިޚުތިޔާރުތަކުގެ ތެރެއިން އޮންލައިކޮށެވެ. ޝަރީއަތުގެ ބައްދަލުވުމުގައި ޓްރަމްޕް ބައިވެރިވެވަޑައިގަތީ އޭނާޣެ އަމިއްލަ ގަނޑުވަރު މާރަލާގޯގައި ހުންނަވައިގެންނެވެ.
ފަނޑިޔާރު ހުކުމް އިއްވަމުން ދެއްކެވި ވާހަކަތަކުގައި، ޓްރަމްޕަށް އިއްވަން އޮތީ އާދަޔާ ޚިލާފު ހުކުމެއް ކަމަށް ވިދާޅުވި އެވެ.
ސްޕްރީމް ކޯޓުން ކުރާ ހުކުމެއްގެ ސަބަބުން ޓްރަމްޕަށް ޖަލު ހުކުމެއް ނައި ނަމަވެސް، ކުށުގެ ސީރިއަސްކަން ނެތިގެން ނުދާނެ ކަމަށް ފަނޑިޔާރު ޖުއާން މާޗަން ވިދާޅުވި އެވެ.
ޑޮނަލްޑް ޓްރަމްޕް އަކީ މީގެ ކުރިންވެސް އެމެރިކާގެ ރައީސްގެ މަގާމު އަދާކުރައްވާފައި ހުންނެވި ލީޑަރަކަށް ވާތީ އާދައިގެ މީހަކަށް ހުކުމްކުރާ ގޮތަށް ހުކުމް ނުކުރެވޭނެ ކަމަށް ފަނޑިޔާރު ވިދާޅުވި އެވެ.
އަދި ކުރިއަށް އޮތް 10 ވަރަކަށް ދުވަހުގެ ތެރޭގައި، އެމެރިކާގެ ރައީސްގެ މަސްއޫލިއްޔަތާ ހަވާލުވެވަޑައިގަންނަވާ ހިސާބުން، ޑޮނަލްޑް ޓްރަމްޕަށް ގާނޫނީ ގޮތުން ހިމާޔަތްތަކެއް ލިބިވަޑައިގަންނަވާނެ ކަމަށް ވެސް ފަނޑިޔާރު ވިދާޅުވި އެވެ.
މިއިން ކޮންމެ ހާލަތަކަށް ރިއާޔަތްކުރެއްވި ނަމަވެސް، ޓްރަމްޕަށް ކުރެވޭ ހުކުމެއްގެ ސަބަބުން ރައީސްގެ މަގާމު ގެއްލިވަޑައިނުގަންނަވާނެ ކަމަށްވެސް ފަނޑިޔާރު ވިދާޅުވި އެވެ.
ޝަރީއަތުގެ މަޖިލީސް ނިންމާލުމުގެ ކުރިން އެއްޗެއް ވިދާޅުވާން ޓްރަމްޕަށް ދެއްވި ފުރުސަތުގައި އޭނާ ވިދާޅުވީ ސީރިއަސް ތަޖުރިބާތަކެއް މިކަމުގައި ކުރެއްވުނު ކަމަށާއި އެމެރިކާގެ ރައީސަކާ މެދު ކުރިވެފައި އޮތް ތުހުމަތުތަކަކީ ނިއުޔޯކަށް ވެސް ހުތުރެއް ކަމަށެވެ.